Iniciativa pol Asturianu denuncia que se ta manipulando cuando se diz que se prohiben escursiones a quien nun cursa asturianu nel CP Gesta

Iniciativa pol Asturianu denuncia que se ta manipulando cuando se diz que se prohiben escursiones a quien nun cursa asturianu nel CP Gesta

Publicada por Redacción Búscolu el 18/12/2017 18:09:07

La organización amuesa la so solidaridá col colexu La Gesta d’Uviéu y defende que’l centru faga actividades propies pa l’asignatura de llingua asturiana como les fai n’otres materies

Iniciativa pol Asturianu quier amosar el so sofitu al colexu Gesta d’Uviéu que según espubliza LNE y una llamentable nota del PP, "ta discriminando al alumnáu que nun va a asturianu", mientres que lo único que fai ye programaciones especifiques pa esta asignatura como se faen davezu pa los que cursen otres materies ensin qu’esto xenere problema nengún.

La organización quier esclariar esta situación en sofitu y defensa de l'asignatura de Llingua Asturiana, onde daveres se producen tolos años torgues per parte de l’alministración de los propios centros pa ser escoyida polos alumnos, suponiendo un pilanco más dientro de la ya de por sí males condiciones que carez l'asignatura. 

Dende'l PP y LNE, colos sos titulares claramente manipuladores, ta suxeriéndose qu'esta situación normal (que l'alumnáu d'una asignatura vaya a les escursiones de la so asignatura y non a les de les otres) "ta xenerando problemes d’esclusión", cuando lo único que faen ye tener un programa propio, coles sos propies salíes del centru, lo cual ye daqué lóxico y que nada tien contra'l restu l'alumnáu. 

Pa Iniciativa pol Asturianu esta ye una falsa polémica, de fondu ta l'actual estratexa de Cherines, presidenta del Partíu Popular d'Asturies, de presentar una postura agresiva contra l'asturiana. Una postura cola que busca dase notoriedá, pero cola que recibe'l refugu de los asturianos y asturianes, que de forma mui mayoritaria defenden la oficialidá y por supuestu, la presencia normal de l'asignatura nos centros educativos.

Asina, recuerden a la sociedá civil que la matriculación d’asturianu nos centros públicos y concertaos ye un drechu de tolos asturianos y asturianes y qu'Iniciativa pol Asturianu va tar ehí siempres y cuando pueda vese vulneráu esi drechu, pa colloborar tanto colos padres y les sos respetives asociaciones como nos propios centros, que consideren fundamentales pal futuru de la llingua propia d’Asturies.

 

 

¿Quiéres comentar? Identifícate o Registrate

También en El Búscolu