N'Abril y nel restu del añu... ¡Puxemos polo nueso!

N'Abril y nel restu del añu... ¡Puxemos polo nueso!

Publicada por Redacción Búscolu el 15/04/2015 09:33:37

Un añu más la dignidá d'Asturies vese pisotiada por mediu de l'aculturización que l'Estáu Español impón nel nuesu país. Les feries d'abril entamaron n'Asturies va unos años y dende entós nun dexaron de medrar, al mesmu tiempu que lo facía'l dineru públicu col que se sovencionaben. A día de güei, son munches les que podemos atopar non sólo nel mes d'abril, sinón a lo llargo de la primavera y el branu.

Estes feries nun son otra cosa qu'una ferramienta más que la burguesía española usa col oxetivu d'aculturizar y finar cola diversidá cultural de los pueblos, nesti casu apropiándose indebidamente d'una migaya descontestualizada de la cultura del pueblu andaluz. Dende Darréu queremos dexar claro que la nuesa denuncia nun va a la escontra de la cultura andaluza, ya que toa amuesa de cultura ye bienllegada si tuviere nun planu d'igualdá. Ensin embargu, tamos asistiendo al funeral de la nuesa propia cultura, a la que les instituciones-y dan la espalda amenorgandoconstantemente'l presupuestu y l'espaciu públicu invertíu nella.

Nesti contestu de crisis cultural y económica, el gobiernu asturianu enfótase n'invertir na aculturización, na imposición, na marxinación de la nuesa cultura. Ye por ello que la Mocedá d'Izquierda Soberanista quier refugar l'emplegu de dineru público con fines aculturizadores nesti tipu d'actos, y encamienta que s'invierta na nuesa cultura, hestoria y llingua; que s'invierta n'Asturies. Lo asturiano tamién val, tamién da beneficios, tamién tien futuru. Ye por ello que dende los nuesos pueblos y conceyos tenemos qu'autoorganizanos y recuperar les nueses fiestes populares, la nuesa tradición y, en definitiva, la nuesa cultura.

Porque Asturies merez respetu, ¡puxemos polo nueso!

¿Quiéres comentar? Identifícate o Registrate

También en El Búscolu