Dende Darréu, la Mocedá d'Izquierda Soberanista queremos unviar el nuesu sofitu a la campaña y dexar nidio que dende la mocedá sofitamos esti proyeutu autoxestionáu que dende hai años yá dinamiza'l barriu carbayón de Pumarín.

La orde de desagospiu respuende a los intereses particulares y especulativos del capital priváu, nesti casu de tol entramáu de la FSA y los sos socios, cola empresa SEDES a la tiesta. Los que dicen gobernar pa tola xente quieren robar a la población d'Uviéu un espaciu llibre de prexuicios ya imposiciones oficialistes. Un espaciu de llibertá y participación onde'l Pueblu ye'l protagonista cimeru de la so propia dinamización sociocultural.
Poro, refugamos les amenaces del poder políticu, económicu y xudicial al CSOA La Madreña y dende Darréu llamamos a la mocedá asturiano a presentar la solidaridá col espaciu autoxestionáu, una esperiencia de cultura, socialización y tamién contrapoder que paga la pena. El CSOA La Madreña somos toos y toes y Uviéu y Asturies merecen un espaciu braeramente democráticu y popular. La Madreña cumple una función social perimportante y el da-y esi protagonismu y esperanza al Pueblu Trabayador ta perriba de la so especulación.
¡La Madreña nun pieslla!