L’Asociación Cultural N’Ast camienta que la nueva refuga del Ministeriu d’Educación, Cultura y Deporte a incluyir Llingua Asturiana comu especialidá nel Real Decretu d’Especialidaes del Oficiu Docente nun tien de sorprender a naide, y menos a los responsables educativos del “Principado”, qu’aprovecharen la Conferencia Seutorial d’Enseñu cellebrada’l pasáu miércoles en Madrid pa tornar a plantegar esta reclamación hestórica cola que se pretenden igualar les condiciones del profesoráu qu’imparte esta materia coles del restu docentes d’otres especialidaes.

Victorina Fernández, representante asturiana na Conferencia Seutorial d’Enseñu en calidá de Direutora Xeneral de Formación Profesional, Desendolcu Curricular ya Innovación Educativa del "Principado", afitó que “lo que queríemos ye que nel artículu sobre les llingües cooficiales s’abriera un puntu nel que se dixera qu’aquelles llingües d’especial proteición puedan ser definíes como una especialidá autonómica. Eso daría estabilidá al profesoráu d’asturianu, pero dixérenme que non”.


Coles sos pallabres, ella mesma ta dando cola clave del asuntu: esto nun pasaría si l’asturianu fuera llingua oficial. El problema ye esi, comu yá manifestemos dende N’Ast en más d’una ocasión, y non que Wert refugue o nun refugue l’asturianu comu especialidá docente. ¿Cómo nun lo van refugar dende Madrid si los que mos gobiernen n’Asturies nun faen un res por regularizar y normalizar la nuestra llingua apurriéndo-y la oficialidá?.


En N’Ast camentamos que, a diferiencia de lo que se dixo dende organismos comu l’Academia de la Llingua Asturiana, nun ye’l Ministeriu el que tien que “entrar en razón y rectificar”, nin too esto arrespuende a una “inxenuidá” del “Principado”. Tampoco nun consideramos que ye “dexación de funciones” que nun fuera la propia Conseyera d’Educación, Ana González, la que tuviera na Conferencia Seutorial, por alcontrase en Nueva York nun viaxe cultural. Too esto arrespuende, simplemente, a que’l Gobiernu del “Principado” nin ye asturianu nin-y interesa un res lo asturiano, y mientres esto nun cambie, de nada val llamentase por coses como la refuga de la especialidá docente pa la Llingua Asturiana… ¡valió yá d’hipocresía!.