IU Asturias - IX sumase al clamor en refugu al zarru de Alcoa

Publicada por Pressy el 09/11/2018 18:51:16

Los dirixentes y militantes d'IX d'Asturies sumase al clamor que n'Avilés demandó la continuidá de la fábrica d'Alcoa. En defensa de los puestos de trabayu, dende la Plaza del Vaticanu a la del Conceyu, caminaron Ramón Argüelles, coordinador xeneral d'IX d'Asturies, Ángela Vallina, eurodiputada d'IX d'Asturies, tolos parllamentarios de la Xunta Xeneral con Gaspar Llamazares y los alcaldes d'Illas y Castrillón, Alberto Tirador y Yasmina Triguero, al pie de los conceyales de la contorna, conceyos toos ellos afectaos, y militantes de toa Asturies. Ramón Argüelles alvirtió qu'una sociedá dependiente de la industria como ye l'asturiana nun puede dexar que se cierren empreses “por puros intereses económicos” ensin tener en cuenta a les families y abogó por una transición enerxética xusta por qu'amenaces como les qu'agora s'acurren sobro Alcoa nun vuelvan asoceder.

Gaspar Llamazares reconoció que se trata d'una manifestación masiva de la que sale una “voz potente y unitaria” a favor del caltenimientu d'Alcoa y de los puestos de trabayu de la contorna d'Avilés y adelantró que ye tamién una voz d'avisu en relación al futuru industrial d'Asturies y al caltenimientu de la industria asturiano pa la que tien d'haber una enerxía que respuenda a les situaciones de les empreses electrointensivas.

Ángela Vallina, eurodiputada d'IX, espresó la murnia que-y produz tener que volver manifestase pol caltenimientu de los puestos de trabayu nuna empresa que nel so día foi pública. Al so xuiciu esto ye “la resultancia de les privatizaciones y de dexar el sector enerxéticu en manos 100% privaes en llugar de caltener l'estáu una parte en sectores estratéxicos como ye esti de la industria y tamién l'enerxéticu”.

¿Quiéres comentar? Identifícate o Registrate

También en El Búscolu