Inútiles y vagos

Publicada por Redacción Búscolu el 04/02/2015 15:48:12

El “Principado” tien 12 proyeutos llexislativos pendientes d'aprebar nesta llexislatura, pero nun tuvo dengún problema pa coyer dos meses de vacancies

El colapsu llexislativu del “Principado”, con 12 proyeutos pendientes d'aprebar d'equí a abril, pon de nueu n'evidencia a esta istitución autonómica impuesta dende Madrid, que nun pasa de ser una mera descentralización alministrativa ensin dengún poder político rial.

A la so absoluta inutilidá hai d’amesta-y la incompetencia de los sos parllamentarios, especialmente los del PSOE nel gobiernu, que fueron acumulando retrasu tres retrasu fasta llegar a esta patética situación, pero que nun tuvieron dengún tipu de problema n’interrumpir les sesiones parllamentaries demientres dos meses “de vacancies”, nuna amuesa más de fasta qué puntu son coscientes del so papel puramente ornamental.

Bramente, demientres estos dos meses de parón parllamentariu del “Principado” la sociedá asturiana nun percibió dengún cambiu respeutu a l’avezada situación d'indefensión na que s'atopa, darréu que la incapacidá d'esta istitución y la so sumisión a los dictaos de Madrid fainla pasar desapercibía dafechu. Pero ye más que protibable que los apurones d'última hora p'aprebar estos proyeutos llexislativos pendientes acaben suponiendo más perxuicios pal Pueblu Asturianu.

¿Quiéres comentar? Identifícate o Registrate

También en El Búscolu