N’Ast pide a Podemos respetu a los drechos llingüísticos de los y les asturianes

Queremos recorda-y a esta formación política que la oficialidá del asturianu ye un drechu democráticu y qu’ensin ella nun va haber cambiu que valga

Dende l’Asociación Cultural N’Ast queremos facer públicu’l nuesu esmolecimientu poles declaraciones que, selmana tres selmana, vienen faciendo los cabezaleros de Podemos al rodiu la llingua asturiana. Y ye que determinaes postures públiques déxenmos plasmaos, más cuando vienen d’una formación política que, supuestamente, lleva naguando dende’l so aniciu por un cambiu sociopolíticu basáu, ente otres coses, nel fondu respetu a los drechos fundamentales de los y les ciudadanes, ente los que s’alcuentren, necesariamente, los sos drechos llingüísticos.