El colectivu musical Muyeres estrena'l so nuevu proyectu, Humanes, el 11 de xineru nel Teatru de la Llaboral

El colectivu musical Muyeres estrena'l so nuevu proyectu, Humanes, el 11 de xineru nel Teatru de la Llaboral

Publicada por Redacción Búscolu el 26/11/2019 21:02:36

Antón García, director xeneral de Política Llingüística del Principáu; Borja Roces, director escénicu; Marta Elola, directora musical, y componentes del grupu Muyeres presentaron esta mañana esti proyectu global, que naz en formatu de discu y espectáculu.

Per primer vez el grupu nun va cantar temes recuperaos de la música tradicional, sinón que creó a costa fecha para esti trabayu histories de muyeres, delles reales y otres de ficción, buciando na contradicción, imperfección y vulnerabilidá de cualesquier ser humanu.

L'espectáculu, diseñáu y empobináu por Borja Roces, recueye, ente otres, histories de muyeres qu'alternaron con Lorca, d'estravagantes solitaries en pueblos pequeños o d'aquelles que venguen la muerta d'un ser queríu con otra muerte más.

El colectivu Muyeres nació en 1993 de la unión de dellos grupos d'investigación etnográfica: Andecha Folclor d´Uviéu, L'Aniciu, Escontra'l Raigañu, Xurgar nas Costumes y Concetsones. Dende entós reivindicó la música tradicional asturiana y el papel de la muyer, en grabaciones como Muyeres, Dancies, bailles, ramos, romances y cantares de los conceyos d’Asturies, Pasamentu y Onde la culiebra canta, n'espectáculos como Inda suenen y nes distintes collaboraciones con artistes como Ramón Prada, Hevai, Xuacu Amieva o Texedor.

Les entraes salen güei a la venta, dende les 12:00 hores, a un preciu de 20 euros pa fosu, de 18 euros pa patiu de butaques, de 15 euros pa palcos y de 12 euros p'anfiteatru. Les localidaes pueden adquirise nos puntos de venta de costume: la Recepción de la Llaboral, el Centru Niemeyer n'Avilés, la Oficina d'Información Turística d'Asturies n'Uviéu/Uviéu, la web entraes.liberbank.es, el teléfonu 902 106 601, la rede de caxeros Liberbank y la mesma web de la Llaboral (www.laboralciudaddelacultura.com).

¿Quiéres comentar? Identifícate o Registrate

También en El Búscolu