Dende la organización política Andecha Astur creyemos que l·entamu de la Feria d·Abril de Sevilla en L·Infiestu nun ye casual, nin muncho menos deriváu d’una demanda popular, sinon qu’obedez a una determinada concepción ideolóxica, de marcáu calter españoliegu Y ye que con ella trátase d·allanar, apriesa y corriendo, el camín nel procesu d·asimilación cultural que vien careciendo Asturies por parte d·un Estáu español qu·emplega determinaos aspeutos de la cultura andaluza pa ello (fenómenu conocíu col nome de flamenquismu).

Esti xabaz procesu d·homoxeneización cultural acarretará consecuencies pergraves, a mediu o llargu plazu, consistentes na perda d·identidá comu pueblu y desapaición de les tradiciones culturales asturianes.

N·Andecha Astur tamién creyemos que la cellebración d·una Feria d·Abril en L·Infiestu ye·l determín políticu más vergoñosu, ablucante y antiasturianu, tomáu pol Ayuntamientu Piloña, a lo menos no que cinca a la estaya cultural. La riestra de despropósitos ye difícilmente superable y a ellos mos remitimos: 1) la Feria d·Abril ye un eventu totalmente ayenu a la tradición cultural asturiana que foi importáu artificialmente, ensin demanda popular, polos representantes escoyíos del conceyu; 2) empléguense los recursos públicos de tolos piloñeses pa fomentar direutamente una cultura dominante y colonizadora al traviés de la que s·intenta desaniciar la llariega. N·otres pallabres, los representantes políticos de la cultura colonizada son los que puxen pola so propia colonización emplegando dineru públicu; 3) en llugar de facer una política que se vuelque dafechu en practicar un intervencionismu cultural de marcáu calter asturianu que potencie y defenda’l patrimoniu natural, cultural y hestóricu asina comu les fiestes tradicionales de Piloña, l·Ayuntamientu dedícase a promocionar, comu másimu referente de les fiestes del conceyu, a grupos y productos foriatos. A diferiencia del restu de conceyos asturianos, que tienen por orgullu y emblema de referencia les sos fiestes tradicionales (en Les Arriondes el famosísimu Descensu·l Seya; en Nava·l Festival de la Sidra; en La Pola los Güevos Pintos, etc.) el conceyu Piloña tendrá, y de fechu tien, el mui triste “honor” de ser l·únicu d·Asturies nel que la so folixa cimera pertenez a una cultura ayena, l·andaluza, emplegada p·aculturizar por parte del Estáu español, y con orixe en Sevilla.

Amás, dende los axentes empresariales ya institucionales implicaos na mesma anicióse y potencióse un estáu d·opinión manipulador de la realidá, nel que se terxiversaron y magnificaron, interesadamente, los probetayos efeutos positivos derivaos del impactu de la Feria d·Abril na economía piloñesa y que respuende a la lóxica de determinaos y mui puntuales intereses. Una política municipal que pretenda puxar pola economía del conceyu favoreciendo l·emplegu y la calidá del mesmu tien d·abordarse al traviés d·un garrapiellu tresversal de midíes y proyeutos con previsión añal que tengan en cuenta dellos aspeutos d·estremada ñatura y non sólo criterios pura y estrictamente económicos (impuestos y tases municipales, financiación d·otras Alministraciones públiques, etc.) col enfotu de xuntar prosperidá económica, cohesión social, sostenibilidá y  defensa de les señes d’identidá asturianes. Nun resulta difícil concluyir que·l seutor hosteleru de L·Infiestu ye·l que resulta beneficiáu casi n’esclusiva por esti eventu. El mesmu tien tola llexitimidá y la obligación de desixir a los poderes públicos que se tomen toles midíes que favorezan la rentabilidá de los sos negocios. Nós asumimos y defendemos esta posición. Por embargu, lo que mos alluga nes antípodes y mos paez de una ética absurda ye que s·aniciase una situación d·exercicio de prostitución cultural dientro d·un “val too” a costa, incluso, de cargase la cultura asturiana, de promocionar a grupos foriatos d·una cultura imperialista y d·estimular, dende L·Infiestu, el xurdimientu de una nueva industria cultural “made in Andalucía” que necesariamente entrará n·abierta competencia colos sectores económicos de la cultura asturiana. Y too ello financiao coles perres de tolos piloñeses y ensin que conlleve un aumentu de contrataciones de trabayadores (d·altes na Seguridá Social) significativu y proporcional al dineru públicu invertíu.

N·Andecha Astur camentábamos que·l nuevu gobiernu del PSOE, supuestamente d·izquierda, pondría la economía al serviciu de la comunidá y lo que ta pasando ye al revés: la comunidá al serviciu de los mercaderes. Peor entá: Piloña al serviciu d·un lobby minoritariu. Poro, podemos concluyir que la Feria d·Abril de Sevilla en L·Infiestu supón un coste económicu con cargu a les arques públiques desproporcional ya inasumible con rellación al probe beneficiu que da y un coste descomanáu, incuantificable ya inasumible con respeuto al dañu que-y fae a la cultura y la identidá asturianes y a los seutores implicaos na industria cultural asturiana.

Por too ello, la organización política Andecha Astur presentó una moción nel Ayuntamientu Piloña (con fecha 16-04-2010 y númberu de rexistru d’entrada 1.503) na que se pide al Plenu Municipal qu·apruebe lo que vien darréu:

1) La supresión, yá, de la Feria d·Abril de Sevilla en L·Infiestu.

2) Da-y vuelta a la situación aniciada convirtiendo al conceyu de Piloña en capital d·asturianía sostituyendo la Feria d·Abril de Sevilla por una Feria de l·Asturianía y Festival Intercélticu, de forma que se faga mediante un reequilibriu territorial en llugares estratéxicos del conceyu (non sólo en L·Infiestu, sinon tamién en Villamayor, Sevares, etc.) col enfotu de xenerar beneficios de forma equilibrada ente tolos habitantes. Ente otres munches actividaes podríen desendolcase les que vienen darréu: charres y esposiciones sobre cultura, hestoria y lliteratura d·Asturies; amuesa y/o competición de deportes autóctonos; amueses de la nuestra gastronomía y de les races d·animales autóctones; conciertos de música tradicional asturiana, etc.

Pa sofitar la presentación d·esta moción, y pidir la so aprebación, Andecha Astur va llevar alantre nos prósimos díes una campaña de recoyía de firmes ente los vecinos y vecines del conceyu, firmes que tamién se presentarán nel Ayuntamientu Piloña.