Direutores de cine d’Asturies reclamen la oficialidá

El manifiestu, firmáu por 35 cineastes, va presentase en rueda de prensa na Academia.

La sala de xuntes de l’Academia de la Llingua Asturiana va acoyer esti llunes, 15 de xunu a les 12 del mediu día, la rueda de prensa de presentación del manifiestu «Cineastes pola oficialidá». Pablo Casanueva, Elisa Cepedal y Ramón Lluís Bande van ser los encargaos de facer la llectura y d’atender a los medios.

Participantes:
Pablo Casanueva (Ribeseya, 1995)
Cineasta y artista visual graduáu en Comunicación Audiovisual pola Universidá de Burgos con un añu SICUE na Universidá del País Vascu en Bilbao. De la so obra rescampla’l curtiumetraxe "8 filmes sobre la guerra" (2021, Premiu Llaboral Cinemateca FICX), "La sele construcción de la memoria" (2018) y "Escontra la casualidá" (2018); la esposición "La imaxe, lo tapecío" (2024); y el llargumetraxe "Luna", que va tener la so estrena esti añu 2024. Destaca tamién el proyectu fotográficu "Xente" (2012-2023) y la web serie "El Cobayu" (2018). La so obra cinematográfica pudo vese en festivales y espacios como’l Festival Internacional de Cine de Xixón, Punto de Vista Festival Internacional de Cine Documental de Navarra, Clermont-Ferrand Festival Internacional de Cortometrajes (Francia), Festival Cineuropa (Santiago de Compostela), LAN Festival Audiovisual Obrero (Bilbao), SACO Semana del Audiovisual Contemporáneo de Oviedo, y Aguilar Film Festival. La so obra plástica formó parte de la Muestra d’Artes Plástiques del Principáu d’Asturies (2022) y pudo vese en espacios como LABoral Centro de Arte (Xixón), Sala Borrón (Uviéu), Factoría Cultural d’Avilés, Antigua Rula (Xixón), Antiguu Institutu (Xixón), Muséu Etnográficu del Oriente d’Asturies (Porrúa), Festival Intercélticu de Lorient (Bretaña, Francia) y Valey Centru Cultural (Castrillón).

Elisa Cepedal (Los Barreros, Llaviana, 1982)
Doctora en Cine pola Universidá d’Exeter y profesora de Cine na Universidá de Westminster. Licenciada en Bellas Artes pola Universidá del País Vascu y con un Máster en Cine en The London Film School. Los sos curtiumetraxes como directora "La Playa" (2010) y "Ay Pena" (2011) proyectáronse nel MoMA, The Film Society of Lincoln Center, Anthology Film Archives y en festivales internacionales como BAFICI, Angers, Guadalajara, Xixón, Raindance y CinemaJove. El so trabayu cinematográficu tuvo nomináu dos vegaes pa los Fuji Awards nel Reino Xuníu y cuntó col sofitu del ICAA, el Principáu d’Asturies, LABoral y el Festival Internacional de Cine Xixón, que la reconoció en 2010 col primer premiu «Nuevos Realizadores del Principáu d’Asturies». Como montadora realizó tres llargumetraxes documentales, una serie documental pa la TPA, numberosos curtios y dos series de televisión pa la BBC como ayudante de montaxe. Los sos dos llargumetraxes, "El trabajo o a quién le pertenece el mundo" y "El Cine, 5", recibieron premios del xuráu internacional nel FICX y participaron en dellos festivales internacionales de prestixu (Art of Real, Sheffield DocFest, Doclisboa, etc.).

Ramón Lluís Bande (Xixón, 1972)
Cineasta y escritor. Ente les sos películes destaquen títulos de non-ficción como "El fulgor" (2002), "Estratexa" (2003), "De la Fuente" (2004), "El Paisano, un retratu colectivu" (2005), "La carta de Bárbara" (2007), "Llende" (2012), "Equí y n’otru tiempu" (2014), "El nome de los árboles" (2015), "Vida vaquera" (2016), "Aún me quedan balas para dibujar" (2017), "Escoréu, 24 d’avientu de 1937" (2017), "Cantares de una revolución" (2018), "Vaca mugiendo entre ruinas" (2020) y "Contracampos" (2022). Con estos títulos participó en festivales como’l Festival de Cine Europeo de Sevilla (SEFF) –Premiu FIPRESCI en 2014–, Festival Internacional de Cine de Xixón (FICX) –Premiu Especial del Xuráu en 2018–, Buenos Aires Festival Internacional de Cine (BAFICI), Festival Internacional de Cine de Mar del Plata, Festival de Cine de Uruguay, Festival Cinema d’Autor de Barcelona (D’A), DocumentaMadrid, Porto-Post-Doc, CinEuropa (Santiago de Compostela), CineEspaña (Toulousse), Festival de Cine de Las Palmas, Márgenes (Madrid) y Zinebi (Bilbao). Con una ventena de llibros espublizaos, destaquen los títulos "Verdá o consecuencia" (1998), "De la vida de les piedres" (1999), "La muerte de los árboles" (2006), "Les habitaciones vacíes" (2009), "Cuaderno del paisaje" (2017), "Templu, cabaña" (2018), "Cuaderno de la guerra" (2021), "Un home que cava" (2021), "Un tesoru y una tumba" (2023) y "El paisaxe belixerante" (2023). Foi director del selmanariu Les Noticies y columnista del diariu El Comercio. Dende va quince años collabora cola Televisión del Principáu d’Asturies (TPA), onde dirixe dende 2007 la revista audiovisual de cultura asturiana, Pieces.


Cineastes Pola Oficialidá

Manifestu

Los abaxo firmantes, un grupu representativu de los y les cineastes que realizamos el nuestru trabayu n’Asturies, queremos posicionanos énte’l procesu abiertu, otra vegada, pa reformar l’artículu 4 del Estatutu d’Autonomía cola fin de declarar oficiales les llingües propies d’Asturies (l’asturianu y l’eonaviegu).

Como trabayadores del sector cultural, vemos que’l riesgu evidente de desapaición d’una llingua ye una situación dramática que supondría una perda descomanada pal futuru de la sociedá asturiana.

L’idioma ye una de les ferramientes más clares que tien el cine pa sorrayar la so pertenencia a una comunidá cultural concreta. Les llingües propies d’Asturies ayúdennos nel nuestru trabayu creativu a consiguir un retratu más exactu del país nes nuestres películes, a alcontrar una definición contemporánea de la identidá colectiva de los asturianos. Nesti sen, necesitamos la oficialidá pa ser llibres a la hora de dar rempuesta a una entruga esencial na xera que realizamos: ¿cómo nos contamos?

Como asturianos y asturianes necesitamos el reconocimientu llegal de les llingües propies d’Asturies y, sobre manera, los derechos llingüísticos de les persones que quieran mandase d’elles na so vida cotidiana. Como cineastes, la falta d’oficialidá ponnos en situación de desventaya, por exemplu, a la hora de buscar financiación pa les nuestres películes fuera del territoriu.

El reconocimientu políticu de les llingües propies va pareyu al desarrollu económicu y social d’un territoriu como vienen amosando comunidaes vecines como Galicia, Valencia, Islles Baleares, País Vascu o Cataluña. Nesti sen, eses comunidaes con llingua propia de la nuestra redolada vienen desendolcando una producción cinematográfica de muncha calidá mandándose de los idiomes propios y asitiando n’espacios internacionales de prestixu a la so comunidá cultural, como ye’l casu del Novo Cinema Galego o’l cine catalán, por citar dos exemplos contrastaos.

La oficialidá –y el consiguiente procesu de normalización que naza guiáu por ella–, ye la única ferramienta pa dar solución a esta anomalía llegal que la sociedá asturiana lleva años soportando. Por eso queremos animar a toles fuercies polítiques con representación na Xunta Xeneral del Principáu, sobre manera a les del centru-derecha: PP y Foro, a que se sumen a esti importante consensu democráticu pa que’l nuestru ordenamientu xurídicu, como manda la Constitución Española, reconoza la oficialidá del asturianu y l’eonaviegu.

Firmantes
1. Luis Argeo (cineasta)
2. Ramón Lluís Bande (cineasta)
3. Sonia Carbajal (cineasta)
4. Pablo Casanueva (cineasta)
5. Sofía Castañón (cineasta y productora – Señor Paraguas)
6. Juan Caunedo (cineasta)
7. Elisa Cepedal (cineasta)
8. Xune Elipe (productor – Goxe Producciones)
9. Lía Fernández Lugilde (cineasta)
10. Samuel Fernandi (cineasta)
11. Sonia Fernández (cineasta)
12. Diego Flórez (cineasta)
13. Inés G. Aparicio (cineasta)
14. Sergio G. Sánchez (cineasta)
15. Inaciu Galán (productor – Cuatro Gotes Producciones)
16. Santos Hevia (cineasta)
17. Fernando Lorenzana (cineasta)
18. Dani Lovi (artista visual)
19. Diego Llorente (cineasta)
20. Teresa Marcos (cineasta)
21. Carmen Menéndez (cineasta)
22. Tito Montero (cineasta)
23. Ángeles Muñiz Cachón
24. Alejandro Nafría (cineasta)
25. Pablo Quiroga (cineasta)
26. José Antonio Quirós (cineasta)
27. Álex Riesgo
28. Jorge Rivero (cineasta y programador)
29. Vera Robert (Productora – De la Piedra Producciones)
30. Gonzalo Tapia (cineasta)
31. Luis Trapiello (cineasta)
32. Omar Tuero (cineasta)
33. Alberto Vázquez (cineasta)
34. Celia Viada Caso (cineasta)
35. Álex Zapico (cineasta)