Inaciu Galán presenta'l so primer llibru de narrativa nel #FormientuEnCasaFest

Inaciu Galán presenta'l so primer llibru de narrativa nel #FormientuEnCasaFest

Publicada por Redacción Búscolu el 21/03/2020 17:32:56

«Cartes nel horru (y delles hestories más)» ye'l primer llibru de Cuatro Gotes Ediciones. Con él estrénase la colección Enriqueta González Rubín

El periodista y escritor Inaciu Galán va presentar esti sábadu 21 de marzu’l so primer llibru de narrativa «Cartes nel horru (y delles hestories más)», editáu por Cuatro Gotes Ediciones. L’actu va celebrase de forma telemática dientro del ciclu cultural entamáu pola plataforma lliteraria Formientu.com embaxo’l títulu #FormientuEnCasaFest esti sábadu 21 a les 19 hores, nel Facebook de Formientu.

 Tres recoyer la so obra poética en trés volúmenes, Inaciu Galán axunta agora en «Cartes nel horru (y delles hestories más)» los rellatos y microrrellatos qu’espublizó en revistes o colos qu’algamó premios nos últimos años, xunto a otros inéditos. Nesti llibru recuéyense pieces narratives escrites en momentos mui distintos y con temes estremaos, que van dende’l terror al amor, pasando pel rellatu hestóricu y la recopilación d’hestories populares, teniendo en común la busca d’un elementu sorpresivu pal llector. La obra ye la primera qu’edita la estaya editorial de Cuatro Gotes y estrena una colección de narrativa col nome de la primer narradora n’asturianu, Enriqueta González Rubín.

"El llibru taba yá impresu va unes selmanes y diba presentase nestes selmanes y paecióme que yera bona idea facelo d’esta forma, facer por siguir con cierta normalidá dientro de la dureza d’esta situación", esplica Inaciu Galán.

Anque nun se pudo distribuyir a les llibreríes, el llibru ta yá a la venta a un preciu simbólicu 2,99 € na plataforma Kindle, d’Amazon col envís de facilitar l’accesu a la llectura nestes selmanes de reclusión pol andaciu de coronavirus .

Inaciu Galán (Xixón, 1986) Doctor pola Universidá d’Uviéu cola investigación «La llingua asturiana nel Franquismu», ye escritor, periodista y xestor cultural. Pol so llabor a favor del asturianu foi reconocíu col Premiu Urogallo, al que se suma a una llarga riesta de premios lliterarios, ente los que destaquen el Premiu Fernán-Coronas de poesía o l’Enriqueta González Rubín de periodismu. Autor del primer diccionariu billingüe asturianu-inglés/inglés-asturianu, asoleyó tamién un llibru pa la reciella «Nel, el coríu que nun sabía nalar» y trés poemarios «Tierra podre» (2016), «Patria en pallabres menores» (2018) y «Nes ruines de la nueche y les hores» (2018). El so llabor nel ámbitu lliterariu llevólu a fundar y dirixir a lo llargo de más d’una década la revista Formientu, dedicada a autores mozos.

L’enllaz nel que van poder vese l’actividá ye’l siguiente:

https://www.facebook.com/formientu/

¿Quiéres comentar? Identifícate o Registrate

También en El Búscolu