Iniciativa pol Asturianu reclama la presencia del asturianu na nueva señalética del Conceyu d Uviéu

Iniciativa pol Asturianu reclama la presencia del asturianu na nueva señalética del Conceyu d Uviéu

Publicada por Redacción Búscolu el 20/01/2021 07:50:37

El Conceyu d’Uviéu anunció esta selmana el cambiu, al traviés d’un contratu públicu, de señalética y de rótulos na capital. Aprovechando esta renovación, Iniciativa pol Asturianu reclama la presencia de la llingua asturiana na nueva señalética del Conceyu d’Uviéu. La organización quier, con esta propuesta, que la llingua asturiana vaya ganando presencia na capital asturiana.

Dende la organización aclararon que “la presencia del asturianu nesta cartelería nun va xenerar nengún costu adicional al contratu. La capital d’Asturies nun puede quedar nun cercu nel que nun se faiga un usu normal del idioma y de la toponimia oficial dende la municipalidá”.

Iniciativa pol Asturianu quixo tamién facer un llamáu al Gobiernu d’Uviéu “pa dar un pasu y que l’asturianu vaya ganando presencia nos espacios públicos y na cartelería d’Uviéu como se facía col gallegu en Vigo o Santiago cuando gobernaba’l PP. La capital d’Asturies nun puede quedar nun cercu nel que nun de faiga un usu normal del idioma dende la municipalidá”.

Nesi sen, dende la entidá pidieron el cumplimientu de la Llei d’Usu, sobremanera dempués de la defensa que d’esta norma fizo’l diputáu de Ciudadanos Sergio García va unos díes en Twitter. “Si dende Ciudadanos s’amparen na Llei d’Usu creemos que ye un momentu ideal pa facer realidá esa defensa d’esta Llei. Ye una bona ocasión de demostrar que tan d’alcuerdu con esta Llei. Tanto’l PP como Ciudadanos tienen la oportunidá de cumplir la Llei d’Usu, qu’hai que cumplila, desarrollarla y dar exemplu”.

Amás, Iniciativa pol Asturianu solicitó la presencia de la llingua asturiana na programación d’esti Xacobéu 2021. Dende la organización apuntaron que “la conmemoración del Xacobéu d’esti añu, qu’entamó con Alfonso II dende Uviéu, ye una oportunidá mui bona pa promocionar l’idioma como faen los gallegos col suyu”.

¿Quiéres comentar? Identifícate o Registrate

También en El Búscolu