Conceyu Abiertu por Llangréu y SMRA consideren que·l preciu del bus Riañu-Llaviana ye abusivu pa la vecindá del Valle·l Nalón.
La llínia d·autobús que percorre·l Valle del Nalón ente Riañu y Llaviana perdió l·añu pasáu 234.000 viaxeros, lo que ye un datu a tener en cuenta, pero tamién hai que considerar que·l descensu d·usuarios dende l·añu 2005 ye d·un millón d·usuarios. Poro, esti descensu ye una constante dende fai dellos años. En pallabres del xerente de Autobuses de Langreo, Julio Álvarez, esti descensu desplícase pol “amenorgamientu de l·actividá económica nel valle y pol descensu de la población”.
Dende Conceyu Abiertu por Llangréu y Conceyu Abiertu por SMRA consideramos qu·esti datu evidencia perbien la situación socioeconómica que vive la cuenca·l Nalón. que calificamos como pergrave y de crisis permanente. Entendemos que les circunstancies económiques y demográfiques qu·indica la xerente responsable del serviciu tienen una gran influencia nel marcáu descensu del númberu d·usuarios de la llínia d·autobús.
Pero al mesmu tiempu queremos denunciar que·l xerente d·Autobuses de Langreo escaeza un factor determinante tamién nesti descensu del númberu d·usuarios d·esti serviciu de tresporte. Y esti factor nun ye otru que·l progresivu y abusivu encarecimientu·l preciu del billete. Atalantamos que·l preciu del billete únicu ye totalmente desproporcionáu cola situación social y económica de la xente y de les cuenques. Encamentamos al xerente d·Autobuses de Langreo a tener en cuenta esti factor y más si de partida tien en cuenta la situación demográfica y económica de la comarca, polo que tendrá facer daqué pa ufrir un serviciu baratu y alcordies a estes condiciones.+
0 Comentarios
Esta noticia todavía no tiene comentarios
Comentar la noticia
El email no será publicado