L·Atenéu Obreru de Villaviciosa, en collaboración col Serviciu de Normalización Llingüística de la Comarca de la Sidra, entama pa esti sábadu 15 d·avientu, a partir de les 11:00, una xornada dedicada a los bolos asturianos que va tener como platu fuerte la presentación del Atles de los bolos asturianos, de Carlos Suari.

Pa entamar, a les 11:00 hores, na bolera del atenéu va celebrase una tirada exhibición na modalidá de cuatriada, na que participarán Sahara y Alicia Rodríguez Sánchez, de la Peña El Berrón y Marcos y René Montoto Soto, de la Peña Manín de Llastres. Al final d·esta exhibición entregaránse obsequios y diplomes a los participantes.

Pa la presentación del Atles de los bolos asturianos, que va celebrase a partir de les 12:00 na planta baxa del atenéu, l·autor va tar acompañáu de Silvia Cosío, de Suburbia Ediciones, y de Desiderio Díaz, presidente de la Federación Asturiana de Bolos. Nesta obra l·investigador Carlos Suari revela·l so estensu saber sobre·l tema, frutu d·un exhaustivu trabayu de campu nun ámbitu d·estudiu, que, a pesar de lo que pueda paecer, nun taba bien esploráu. El propiu autor indícanos que l·Atles de los Bolos Asturianosnun ye un manual de bolos, ye un estudiu de toles modalidaes de bolos asturianos acompañáu de imáxenes, dibuxos y mapes, que tracen un estudiu seriu y rigurosu d·una de les señes d"identidá de la cultura asturiana.

Al finalizar la presentación va facese una demostración de delles de les variedaes del xuegu de bolos que se pueden atopar a lo llargu de la xeografía asturiana y que se traten nel Atles.