La Constitución Española de 1978 vien vendiéndose les más de les vegaes nos medios d·información y na educación, como un testu llegal modélicu, frutu del consesu y de la bona voluntá de toles partes, especialmente del réxime franquista que venía protagonizando darréu una supuesta apertura democrática
Eso ye una mentira tarrecible. La realidá ye que·l xenocidá morrió na cama nel 75 y qu·hasta dando les boquiaes perafitó la so voluntá de dexalo too "atáu y bien atáu". Franco y los sos collaboradores como Fraga o Martín Villa foron ministros cuando se roblaron sentencies de muerte de persones condergaes en xuicios sumarios derramando asina·l sangre de la disidencia, lo mesmo que ficieron cuando enxamás-yos tremó·l pulsu pa reprimir a los sos enemigos, reprimiendo, torturando y asesinando a cientos d·inocentes incluso dempués d·entrar en vigor la Constitución .La CE nun foi frutu de denguna negociación ente iguales, siquiera una muestra de bona volutá sinón que representa una imposición. Foi·l mecanismu del réxime franquista pa facer un llaváu de la so desgastada imaxe y al mesmu tiempu, esfarrapar los crecientes movimientos populares que cuestionaben tol sistema. Poro, atalantamos que nun ye más que·l reflexu la ideoloxía de les clases dominantes españoles y polo tanto una ferramienta al so serviciu. Asina mientres el drechu a decidir, a la vivienda, al trabayu o a la escolarización na llingua materna de caún nun tienen efectividá dala nin puen ser reclamaes ente dengún xuez o tribunal poles persones, si garantiza dafechu la sacrosanta propiedá privada o la unidá del Reinu col papel del exércitu como guardián della baxo·l mandu del monarca, esfrutando asina los poderes fácticos del papel esencial nel testu constitucional. La CE ye en cualquier casu una norma illexítima, que nun tien el preste democráticu de quienes anguaño vivimos dientro de les llendes del reinu español, dau que solu pudieron participar nel referéndum del añu 78 quienes nacieron enantes del añu 1960.
Del mesmu mou que cola llegalidá, pretenden facer pasar la Segunda Restauración y a la corripia real, n·especial al Rei, como demócrates exemplares cuando la realidá ye que·l so papel nesi sen ye, cuando menos, escura.
Pesie a too, lo cierto ye qu·enxamás desapaeció dafechu quienes teníen una visión alternativa a la oficial sobre la hestoria recién del Reinu d·España y la nomada transición. Anguañu podemos afirmar que·l cuestionamientu d·esti réxime pseudodemocráticu que carecimos tres la muerte del xeneral facista ta esbarrumbándo dafechu y la crisis de llexitimidá alcanza tolos requexos del sistema, abriéndose asina nueves víes y horizontes que les organizaciones polítiques y sociales, les clases populares, tenemos la obligación d·aprovechar.
Pa nós la monarquía ye un réximen anacrónicu y antidemocráticu, ensin importar el nome del caudillu, toos ellos representen una hestoria de vencedores y vencíos como nun podía ser d·otra manera nun país de fonda tradición de llucha y nomáu pola corona española restaurada como "Principado", de xuru pa que nun escaeciéramos derrotes militares que vienen d·antiguo y lo carecíu embaxo la bota militar española.
Nesta hestoria quienes tamos abaxu y que somos el pilpayu nel que s·afita esti sistema seremos ensin dubía nos meses vinientes motor de cambeu. Poro apostamos por siguir
enanchando, dende los conceyos, los procesos de xunidá popular, favoreciendo la participación y amestando al Pueblu a los procesos de toma de decisiones coleutives per aciu de los conceyos abiertos y la xunidá dende abaxo.
Dende·l movimientu políticu Conceyu Abiertu cellebramos además l·acuerdu ente delles organizaciones de la izquierda pa facer una convocatoria xunitaria alrodiu de la fecha del 6 d·Avientu baxo·l llema "Somos República". Atalantamos que ye un avance, yá que por primer vegada la tradición de la izquierda española y la asturiana entama una convocatoria xunciendo asina estremaos puntos de vista alrodiu d·una idega común republicana. Tamos segures que tolos pasos que se den nel sen de dir haza la xunidá d·aición son necesarios y qu·esi ye·l camín nel qu·afondar nel futuru inmediatu nesti país a la gueta d·algamar una sociedá xusta y democrática dafechu.
0 Comentarios
Esta noticia todavía no tiene comentarios
Comentar la noticia
El email no será publicado