D’aplicase esta llexislación del “Principado” apelligraríen tamién la tonada y los cancios de chigre. llexislación autonómica que se-y aplica al Cá Beleño ye de 2002, pero fasta la llegada de Somos al ayuntamientu uvieín enxamás nun fuera aplicada.

Andecha Astur quier faer públicu’l so sofitu al Cá Beleño, menaciáu pol Ayuntamientu d’Uviéu con sanciones económiques, apelando a una llexislación del “Principado” de 2002, enxamás nun aplicada fasta la llegada de la nuea corporación municipal.

Dende Andecha Astur considérase que l’aportación social y cultural del Cá Beleño ye daqué fuera de cualisquier dubia, y que la notificación al mesmu por parte d’Ignacio García del Páramo, conceyal de Llicencies na que-y remembra “la prohibición de realizar en el local actuaciones musicales en directo” costitúi una intolerable agresión non solo al propiu establecimientu, sinon a la cultura asturiana en xeneral y a los músicos asturianos en concreto.

Per otru llau, Andecha Astur considera llamentanble que se pretenda xustificar esta actuación recurriendo a la Llei d’Espeutáculos del “Principado” de 2002, qu’enxamás nun fuera aplicada fasta agora, y nun pue menos que calificar de burlla les declaraciones d’Ana Taboada afirmando que l’equipu de gobiernu del conceyu d’Uviéu “nun intervendrá sin nun hai una denuncia vecinal”, lo que supón poner al Cá Beleño nuna situación “suicida”.

Per otru llau, y no que cinca a la llexislación del “Principado” qu’agora usa la nuea corporación municipal uvieina escontra’l Cá Beleño, Andecha Astur allerta de que la so aplicación supondríe tamién la fin de la tonada y los cancios de chigre, espresión de la cultura asturiana de la sidre acabante de declarar Bien d’Interés Cultural pol mesmu “Principado” y anguañu pendiente de declarar Padrimoniu Imaterial de la Humanidá pola UNESCO.

Ello asina, Andecha Astur reclama tantu la modificación d’esa gafa llei del espeutáculu del “Principado”, afayándola a la rialidá social y cultural asturiana, y la fin de l’actitú agresiva del Ayuntamientu d’Uviéu escontra’l Cá Beleño.