Conceyu Abiertu por Uviéu énte·l pieslle de la fábrica d·armes de La Vega

Publicada por Redacción Búscolu el 13/04/2012 00:00:00

La multinacional General Dynamics anunció ayeri públicamente·l zarru de la fábrica d·armes de La Vega.

Trátase d·una de les dos coles que la compañía cunta nel conceyu d·Uviéu, según despliquen “pa racionalizar los costes y la producción”, treslladando, según dicen, a los trabayadores a la fábrica de Trubia.

Sicasí, dende Conceyu Abiertu por Uviéu vemos esta midida de la multinacional armamentística con desconfianza, debío a que, en primer términu, paez percomplicao caltener nuna sola factoría al total de la plantilla cola qu·anguaño cunten, repartía en dos. Poro, en casu de que General Dynamics realice despidos, seyan inmediatos o a mediu plazu, dende esta plataforma de ciudadanos y ciudadanes refugamos dafechu la midida, puesto que tamos nun conceyu que supera les 20.000 paraes y paraos.

Amás, dende Conceyu Abiertu por Uviéu camentamos que los tarrenes onde s·asitia la factoría son de gran valir urbanístico, polo que sospechamos de posibles pelotazos futuros nún espaciu qu·anguañu aporta actividá productivo que caltién a cientos de trabayadores, polo qu·en casu de que se pieslle la fábrica, desiximos que dende les instituciones públiques nun se permita nengún usu de los tarrenes fuera del ámbitu industrial, pa evitar asina que los especuladores desendolquen un nuevu pelotazu nel nuesu conceyu.

D·otru lláu, tamién creyemos prioritario que la multinacional GD garantice·l furrulamientu dafechu del conxuntu d·actividaes que desarrollen tanto en dambes factoríes, debío a que, por exemplu, na Vega hai instalaciones como·l campu de tiru, coles que nun cunten en Trubia, polo qu·en casu de pieslles éstes deberíen ser treslladaes inescusablemente p·asina garantizar l·actividá.

Pa finar, dende CA por Uviéu queremos afitar que·l sofitu d·ésti movimientu va destináu al coleutivu de trabayadores, considerando prioritario caltener l·actividá industrial y los puestos de trabayu que xenera independientemente de que·l so fin productivu seya más o menos custionable. La realidá ye qu·anguaño nun hai alternativa que sustituya l·actividá industrial que xeneren les fábriques d·armes, polo que, dao que l·alternativa ye la nada, puxamos pola continuidá dafechu de tolos puestos de trabayu.

¿Quiéres comentar? Identifícate o Registrate

También en El Búscolu