Cherines pónmoslo fácile

Publicada por Redacción Búscolu el 19/02/2016 22:30:27

Andecha Astur llama a movilizase’l prósimu 25 febreru.

Acullá de la llóxica indignación prevocada pol tweet de Mercedes Fernández, felicitándose por tener algamao que l’español siga siendo l’únicu idioma válidu na Xunta Xeneral, col sofitu del PSOE y Cs, lo cierto ye que la so intransixencia españolista pon n’evidencia l’ausencia de cualisquier alternativa que nun pase pola oficialidá.

Les postures seudoreformistes d’una oficialidá a pasiquinos, peleándomos por una horina más de tele n’asturianu, por que se xeneralice l’asturianu nes escueles, por que vaiga recuperándose la toponimia, por amenorgar el grau de represión llingüística... queden de nueu y definitivamente n’evidencia énte estes actitúes.

Agora más que nunca queda nidio que nun hai denguna salida que nun pase pola Oficialidá, nin hai alternativa pa la normalización democrática que nun seya de magar de la reconocencia de los nuesos drechos, el restu ye engañar.

Frente a la política de xestos que pretenden faer ver que les coses tan camudando, que compartimos un mesmu enfotu y que lo que mos estrema ye la forma en que vemos que tienen que facese les coses, que la reivindicación d’oficialidá ye un radicalismu inútil frente a polítiques práutiques que son les efeutives… la rialidá torna a ponémoslo fácile. Ensin Oficialidá nun hai denguna posibilidá.

Metantu y non, nun avanzamos, IU y Podemos siguen faciendo’l llabor de posturéu ensin conteníos. Ellí onde tienen responsabilidaes polítiques siguen cola mesma política de xestos ensin fechos. Dengún de los ayuntamientos nos que gobiernen, dalgunos dende hai munchos años,  cunta con ordenances municipales que reconozan drechos llingüísticos y tolo más disponen de “oficines de política llingüística” coles que mazcaritar de nueu con xestos l’ausencia de reconocencia d’esos drechos. Nesi sen, Cherines nun ta lloñe de Llamazares nin d’Emilio León, digamos que la primera presume del sistema de represión llingüística y los otros permítenlu y utilícenlu políticamente.

 

Ello asina, Andecha Astur perafítase na necesaria oficialidá de la llingua asturiana, y amiéstase a la movilización convocada pola Xunta pola Defensa la llingua pal prósimu 25 febreru n’Uviéu.

¿Quiéres comentar? Identifícate o Registrate

También en El Búscolu