El Teixu apoya la reivindicación de los vecinos d’Olivares en defensa de la toponimia popular y tradicional

Publicada por Redacción Búscolu el 23/12/2016 23:47:52

Dende l’asociación El Teixu, Rede pal Estudiu y Defensa de la Llingua Asturllionesa, como defensora del padremuño lingüísticu del ámbito asturllionés, apoyamos les reivindicaciones de los vecinos del llugar d’Olivares (Uvieo) en favor de la conservación de la so toponimia tradicional y popular.

Hasta’l momento los caminos del llugar d’Olivares nun teníen nomes recoyíos nos nomenclátores oficiales, polo que’l Conceyu entamó un proceso abiertu pa que la población propunxera nomes y los escoyera por votación. Nesti sen, xunto con distintes propuestes de mantener los nomes de siempre, existe otra alternativa que propón rebautizar los caminos con nomes de xugadores de fútbol del Rial Uvieo. Una elección abierta a tola población d’Uvieo podría favorecer l’apoyu mayoritariu a propuestes como estes –que son ayenes al interés de la mayoría de los vecinos y vecines del llugar– por parte de vecinos del conceyu ensin vínculos con Olivares. 

Por esta razón, dende El Teixu apoyamos la reivindicación de los vecinos de limitar la votación únicamente a los habitantes de la zona afectada.

Per otra banda, consideramos que nun hai necesidá d’abrir a votación el nome d’elementos xeográficos que yá tienen una denominación popular y tradicional autóctona, non motivada por intereses externos. Ello ye que los nomes tradicionales propuestos polos vecinos d’Olivares son los que xeneró históricamente la propia comunidá y los que se vienen usando de manera oral dende antiguo. Amás, esta toponimia describe con recisión una xeografía rural que va camín de sumise frente al avance de la ciudá contra l’oeste. Topónimos como La Cuesta Olivares, La Campa, El Cotariellu, La Torre, La Quintana, La Frialdá, La Vallina o El Salgueru falen d’un paisaxe rural que ta a puntu de morrer y sirven de recuerdu de la historia d’esa tierra y de seña d’identidá de los homes y muyeres que vivieron y trabayaron allí. Otra manera, tienen la virtú de ser toos ellos nomes neutros no ideolóxico, que nun xeneren conflicto entre persones con idees o creyencies diferentes.

El Teixu, Rede pal Estudio y Defensa de la Llingua Asturllionesa ye una asociación fundada en 2007 n’Estorga (Llión) por xente de La Tierra de Miranda, Zamora, Llión y Asturies pa defender l’asturllionés dende la so unidá y el respecto a les variedaes internes. Pa ello desenvuelve actividaes d’estudio, divulgación y promoción per tol ámbito del idioma.

¿Quiéres comentar? Identifícate o Registrate

También en El Búscolu