Iniciativa pol Asturianu quier amosar el so descontentu pol escaezu del nuevu rei, Felipe VI, na so ceremonia de proclamación nel Congresu de los Diputaos

El nuevu xefe d'estáu español faló nel so discursu de la convivencia de les tradiciones y les cultures diverses, que comentó "tiene su mejor expresión en el concierto de las lenguas", citando a autores en castellán, vascu, catalán y gallegu, pero non n'asturianu. Arriendes d'ello, al terminar la so intervención despidióse con un "munches gracies" en castellán, catalán, vascu y gallegu, pero non, n'asturianu.


Al nun refirise a les llingües oficiales, sinón a les llingües d'España, esti escaezu da señal d'un mal comienzu no que cinca al respetu del nuevu monarca pa cola llingua d'Asturies, una realidá que conoz bien, dempués de cuasi cincuenta años como Príncipe d'Asturies y continues visites al Principáu.


Dende Iniciativa pol Asturianu aguardamos que la Casa Real corrixa esti escaezu a la llingua asturiana, que nun siendo llingua oficial entá, sí ye una llingua protexida pola Constitución y pol Estatutu d'Autonomía, amás de la Llei d'Usu del Asturianu, vixente dende 1998.