Iniciativa pol Asturianu denuncia les declaraciones discriminatories de la Mercedes Fernández

Iniciativa pol Asturianu denuncia les declaraciones discriminatories de la Mercedes Fernández

Publicada por Redacción Búscolu el 16/02/2016 19:52:41

El PP felicítase por evitar que s’use l’asturianu na Xunta Xeneral, tres una propuesta de so que votaron tamién PSOE y C’s

Iniciativa pol Asturianu quier denunciar les declaraciones del PP d’Asturies y de la so presidenta Mercerdes Fernández, que presume nuna nota de prensa de llograr “que el castellano sea la única lengua del Parlamento en Asturias”, una acción que ye ensin dulda nenguna una discriminación, pa la que los populares cuntaron cola ayuda del votu favoratible del PSOE y C’s, que se sumaron a la votación pa evitar que les convocatories pa la Comisión sobre la situación del asturianu na Xunta Xeneral pudieran dir en billingüe. 

Tamos énte una de les acciones más llamentables contra l’asturianu de los últimos años, yá que Mercedes Fernández y el so partíu presumen nos medios de discriminar a los falantes d’una de les llingües d’Asturies y afonden nos prexuicios yá superaos pola mayor parte de los asturianos, que nun entienden, como nun entendemos nós, que s’ataque d’un mou tan agresivu a una llingua que ta nuna situación de gran debilidá cuando se trata de facer un usu que nun pasa de lo simbólico y pa falar de la propia llingua. 

Denunciamos tamién la postura de la FSA-PSOE y C’s sofitando la prohibición del PP d’usar l’asturianu nesta comisión, siendo cómplices d’esti llamentable ataque a los falantes d’asturianu, que ven como los insulten los sos representantes na Xunta Xeneral. Entrugámonos cómo ye posible que’l PP califique de “pequeña victoria importante” un “llogru” antidemocráticu y anticonstitucional como esti y qu’al mesmu tiempu tengan l’atrevimientu de falar de que quieren “que el bable forme parte de nuestro acervo cultural”, mientres faen tolo posible p’acabar col idioma. 

Esiximos al PP y a les fuercies polítiques qu’apoyaron al so propuesta na comisión, una rectificación total y que se permite usar l’asturianu con total normalidá, cola mesma normalidá cola que los asturianos usen cada día la so llingua nes cais y nos caminos d’Asturies.

¿Quiéres comentar? Identifícate o Registrate

También en El Búscolu