Iniciativa pol Asturianu regala un cursu d’asturianu a los diputaos y trabayadores de la Xunta Xeneral pa meyorar la so capacidá y sensibilidá llingüística

Iniciativa pol Asturianu regala un cursu d’asturianu a los diputaos y trabayadores de la Xunta Xeneral pa meyorar la so capacidá y sensibilidá llingüística

Publicada por Redacción Búscolu el 26/02/2016 22:15:35

La organización entregó ayeri una carta a los grupos de la Xunta Xeneral na que s’ufre un cursu gratuitu nes propies instalaciones del Parllamentu

Esti xueves 25 Iniciativa pol Asturianu participaba na concentración qu’axuntó a cientos de persones cabo la Xunta Xeneral d’Asturies, n’Uviéu. Aprovechando esti momentu de reivindicación y les cuasi 3.000 firmes consiguíes por Iniciativa pol Asturianu na plataforma Change.org, Inaciu Galán, presidente de la organización entregó nos rexistros de tolos grupos políticos presentes na Xunta Xeneral un escritu nel qu’informamos de les firmes recoyíes,  solicitando un cambiu nesta postura y nel qu’ufrimos los nuesos medios pa celebrar un cursu d’asturianu pa los diputaos y trabayadores de la institución. Una inciativa cola que la organización quier construyir en positivo dientro de la Xunta Xeneral a favor d’un consensu alredor de la dignificación del asturianu.

La organización solicitó, tamién al traviés d’un escritu, a Pedro Sanjurjo, presidente de la Xunta Xeneral d’Asturies, que ceda un espaciu y dea facilidaes pa la celebración del cursu propuestu. Un cursu que quier da-yos unes nociones básiques d’asturianu a los diputaos y trabayadores que nun conozan bien l’idioma, amás d’esplicar la situación sociollingüística y llegal del idioma. 

El cursu, que de ponese en marcha, taría abiertu a diputaos de tolos grupos y trabayadores del Parllamentu asturianu, ye una propuesta que quier sensibilizar a los grupos políticos y adentrar a los diputaos y diputaes na llingua qu’usen cada día munchos de los ciudadanos a los que representen y tamién dellos de los diputaos al espresase na actividá parllamentaria. 

 

Ver Cartes

¿Quiéres comentar? Identifícate o Registrate

También en El Búscolu