El representante de la formación morada detalló que «vamos esixir que se suprima yá’l peaxe del Güerna, que se terminen d’una vez les obres de la variante de Payares, que s’abra de nueves la ruta marítima ente Xixón y Nantes y vamos plantiar el problema que sufre tola rede de cercaníes ferroviaries n’Asturies». Faló tamién de «la importancia que tien abordar con midíes reales la situación de crisis demográfica que ta sufriendo Asturies. Vamos face-y llegar les nueses propuestes, ente elles la necesidá de que’l ciclu educativu de cero a tres años seya gratuitu, universal y públicu».
Enrique López informó de que pal plenu d’esta semana na Xunta Xeneral «llevamos seis preguntes y dos iniciatives» y empezó mentando la «aprobación o rechazu del dictame de la comisión d’investigación de Gitpa, que dempués de dos años y mediu de trabayu con munches torgues destapó una trama qu’aumentó los gastos y el kilometraxe de fibra óptica y que podría superar n’entidá al casu Marea. Tamos falando de sesenta millones d’euros en fibra óptica, de treinta y tres kilómetros de más».
Amás, añadió, «vamos llevar una iniciativa relacionada colos centros de protección de menores y la degradación que se ta produciendo nellos, y queremos saber cuálu ye’l futuru del Centru del Calamar Xigante. Vamos preguntar al Gobiernu sobre la situación precaria del tresporte escolar, sobre too nes zones rurales, y vamos interpelar sobre’l nuevu modelu de financiación autonómica y sobre’l cumplimientu de los acuerdos que se firmaron nel so momentu pa la venta de Tenneco».
Na sesión del vienres, la formación morada va presentar «una moción relacionada col usu turísticu y lúdicu del Parque Nacional de los Picos d’Europa y una proposición non de llei sobre l’impactu que podría tener pa les arques públiques la disolución de Sogepsa».
Asinamesmo, Enrique López espresó «la repulsa y refugu a les amenaces de muerte recibíes pola alcaldesa de Riosa, Ana Díaz, y pol conceyal José Manuel Pello. Tienen tol respaldu de Podemos Asturies ellos, tolos ediles d’IU y del restu de grupos y la propia organización Izquierda Xunida».
0 Comentarios
Esta noticia todavía no tiene comentarios
Comentar la noticia
El email no será publicado