El colectivu de docentes con discapacidá lleva años esixendo l’aplicación de la reserva de places non solo na ufierta pública d’empléu, sinon tamién na xestión posterior de les llistes y la concesión de les vacantes y sustituciones al profesoráu interino asturiano. La proposición non de llei pidía al Gobiernu asturianu’l cumplimientu de los porcentaxes reservaos a profesoráu con dalgún tipu de discapacidá tanto na ordenación de les llistes como nos llamamientos posteriores y axudicaciones de places. Ún de los puntos de la mesma prevía «garantizar l’acumulación de los llamamientos de vacantes y sustituciones nes diferentes convocatories de forma qu’al alcanzar el númberu 14 se proceda al nomamientu d’un interinu con diversidá funcional, estableciendo que los llamamientos se realicen en función del cupu establecíu y de siguío, cola correspondiente axudicación».

Los cambios de sielles paez que nun conducen a cambios de polítiques en materies clave. Nin el reemplazu de Roberto Suárez Malagón por Manuel Villar Cordero como director xeneral de Personal Docente nin el cambiu de Javier Fernández por Adrián Barbón como cabezaleru del cartelu del PSOE asturianu supunxeron una meyora na situación d’aquelles persones que, a pesar de toles torgues, llograron una calificación nos concursos-oposición merecedora d’una plaza d’interinos, según les sentencies xudiciales.

Los anuncios estrella realizaos pol Executivu de Pedro Sánchez al paecer nun son capaces de cruciar el puertu de Payares. Preguntámonos cómo ye posible que n’otres comunidaes, como Canaries, s’aplique’l sistema d’asignación por bloques o que n’Andalucía s’elevara’l porcentaxe reserváu hasta un 10% mientres n’Asturies se caltién nel mínimu esixible del 7%.