PODEMOS Asturias - Nuria Rodríguez: «El tramu educativu de cero a tres ha de ser asumíu na so totalidá pola Conseyería d’Educación»

Publicada por Pressy el 06/04/2019 08:35:01

Nuria Rodríguez dixo esti vienres en Xixón que «el ciclu de cero a tres años ye un tramu educativu qu’ha de ser asumíu na so totalidá pola Conseyería d’Educación». La portavoz de Podemos Asturies y númberu tres de la candidatura autonómica pola circunscripción central pa les elecciones de mayu sofitó d’esi mou la demanda planteada pola presidenta de l’Asociación d’Escueles Infantiles Públiques d’Asturies, Henar García, que recalcó la necesidá de que les escueles infantiles dependan esclusivamente de l’Alministración autonómica.

La candidata del partíu moráu señaló que «ún de los nuestros exes políticos fundamentales ye la defensa de la gratuidá de les escueles de cero a tres años. Entendemos qu’ha de ser un derechu universal y accesible pa toles neñes y pa tolos neños». Amás, añadió, «tenemos claro que, precisamente por tratase d’un derechu universal, nun tien qu’estendese solo a la población receptora, que son les nuestres fíes y fíos, sinon que tamién han de ser teníos mui en cuenta los derechos de les trabayadores d’esti tramu educativu». Nesi sentíu, Nuria Rodríguez recordó que «siempre defendimos y vamos siguir defendiendo que toles trabayadores del ciclu educativu de cero a tres tengan los mesmos derechos llaborales y retributivos».

¿Quiéres comentar? Identifícate o Registrate

También en El Búscolu