PODEMOS Asturias - Paula Valero: «L’Estatutu de la Muyer Rural y de la Mar tien como oxetivu favorecer a ún de los sectores más sensibles y agraviaos»

Publicada por Pressy el 09/11/2018 00:16:03

Paula Valero señaló esti martes, na rueda de prensa de presentación de la proposición de llei del Estatutu de la Muyer Rural y de la Mar que Podemos Asturies va llevar al plenu d’esti vienres nel Parlamentu asturianu, que «esti testu tien como oxetivu actuar pa favorecer a ún de los sectores más sensibles y agraviaos, como son les muyeres que viven nel entornu rural y que sufren una doble brecha, por ser muyeres y por vivir en zones rurales». Añadió que «l’ámbitu rural necesita una atención específica ante la desigualdá p’abordar d’una manera eficaz ún de los mayores problemes que tien Asturies, que ye’l despoblamientu».

La diputada de la formación morada detalló que la proposición de llei estructúrase en seis títulos, con un total de 28 artículos qu’inclúin midíes xenerales y específices pal sector agrariu y de la mar, amás d’asuntos relativos a la participación y la representación de les muyeres, y derechos y prestaciones sociales en favor de la igualdá, ente otros aspectos.

Pola so parte, Jara Cosculluela, portavoz d’Organización y responsable de Feminismos de Podemos Asturies, dixo que «esti Estatutu ye una cuestión tanto de xusticia como de compromisu feminista, sobre too dempués del pasáu Ochu de Marzu, que punxo a Asturies y al nuestru país nel sieglu XXI coles muyeres al frente». Señaló que la nuestra comunidá autónoma «nunca más ha de vivir d’espaldes a les sos muyeres y nengún plan contra la despoblación puede facese ensin contar colos derechos fundamentales y reales de les muyeres rurales y costeres».

Resaltó, ente les midíes propuestes, «una que consideramos fundamental y que tien que ver con establecer programes de subvenciones pa la prestación de servicios relacionaos col apoyu y cuidáu a menores y mayores». No que cinca a salú llaboral y planes de formación, Jara Cosculluela asegura que ye «imprescindible que dispongamos d’información detallada de los intereses, situaciones y deseos de les muyeres nel mediu rural y costeru pa poder tener en cuenta planes específicos, porque nun val el mesmu plan pa les muyeres que vivimos n’Uviéu que pa les que viven nel nuestru mundu rural y costeru».

Mayi Colubi, responsable de Mundu Rural de Podemos Asturies, punxo l’acentu en que «n’Asturies nun hai datos por conceyos nin por perspectiva de xéneru que permitan realizar un estudiu afayadizu sobre’l despoblamientu, que permitan conocer la situación concreta y detallada de les muyeres que trabayen nel mundu agrariu y de la mar». Y, nesi aspectu, llamentó que «aquello que nun se conoz, nun se tien en cuenta y nun se corrixe».

¿Quiéres comentar? Identifícate o Registrate

También en El Búscolu