PODEMOS Asturias - Podemos Asturies comprométese a establecer la gratuidá de la universidá

Publicada por Pressy el 09/04/2019 08:35:02

La cabeza de llista autonómica del partíu moráu recordó qu’esta propuesta «va en llinia col acuerdu presupuestariu qu’algamamos nel mes d’avientu y que redució les tases universitaries nun 25%, lo que supón un aforru mediu por estudiante d’ aproximao 300 euros». Lorena Gil punxo l’acentu na importancia de contar con «una educación universitaria gratuita, como yá la hay n’al menos once países europeos. Nun podemos permitinos un sistema que carga la financiación de la universidá pública sobre l’estudiantáu».

Pela so parte, Daniel Ripa aseguró que la propuesta «ye viable con tres paquetes de midíes, qu’estimamos n’alredor de dieciséis millones d’euros. Diba pasar por una reducción de salarios d’altos cargos nun 30%, lo que diba suponer más de tres millones y mediu añales. Tamién midíes de reducción de la corrupción, esperamos recaudar unos cinco millones con un funcionamientu independiente de la Sindicatura de Cuentes, una Oficina Anticorrupción y criterios más estrictos na contratación pública». Un tercer bloque de midíes pa garantizar esa financiación diba basase, en pallabres del secretariu xeneral de Podemos Asturies y númberu dos de la llista autonómica, en «actuaciones contra’l fraude fiscal, colo qu’estimamos que se diba recaudar alredor de nueve millones d’euros cada añu y ente elles diba incluise la publicación de los datos de grandes morosos y de grandes fortunes que nun tán pagando n’Asturies. Tenemos claro qu’hai dineru pa contar con una universidad gratuita y sabemos dónde lo hay».

Ángeles Fal, responsable de Educación de Podemos Asturies, señaló que «una propuesta como esta supón una apuesta tanto pola universidá pública como pola mocedá asturiana. Ye una actuación cola que se va llevar, por fin, la equidá a los estudios superiores y que va suponer que la mocedá asturiana pueda tener un accesu a la educación superior ensin torgues de tipu económicu».

¿Quiéres comentar? Identifícate o Registrate

También en El Búscolu