PODEMOS Asturias - Podemos Asturies lleva a comisión les conexones aérees y la construcción del IES de La Corredoria

Publicada por Pressy el 09/11/2018 00:16:07

La coportavoz parlamentaria, Lorena Gil, plantea una pregunta urxente pa responder oralmente pol conseyeru Isaac Pola na Comisión d’Empléu, Industria y Turismu de la Xunta Xeneral sobre «qué responsabilidaes piensa asumir pola so nefasta xestión en materia de conectividá aérea». La representante de la formación morada denunció públicamente va unos díes que «por vez primera en cuasi trenta años l’aeropuertu d’Asturies nun va tener nenguna conexón internacional. Ye una situación mui grave que nos aísla tovía más. Hai midíes que se pueden tomar y, dende llueu, dalguién habría d’asumir responsabilidaes nel Gobiernu».

Pola so parte, la diputada Lucía Montejo va preguntar na Comisión d’Educación y Cultura al conseyeru Genaro Alonso «cómo piensa cumplir les promeses respecto a la construcción del IES de La Corredoria dempués de que los pliegos pa la redacción del proyectu fueran tumbaos por contener irregularidaes». La parlamentaria de Podemos Asturies yá dexó claro primero que «dende l’entamu de la llexislatura llevamos insistiendo na necesidá de que s’inicien les obres del Institutu de La Corredoria. El centru qu’esiste anguaño ta dafechu masificáu, nun puede siguir atendiendo nin un minutu más les necesidaes del alumnáu del barriu de La Corredoria».

La Comisión d’Empléu, Industria y Turismu va reunise a les diez de la mañana y la d’Educación y Cultura a les cuatro de la tarde, na sala Martínez Marina del Parlamentu asturianu.

¿Quiéres comentar? Identifícate o Registrate

También en El Búscolu