Programación especial pola mor de la Selmana de les Lletres.
Pola mor de la 45 Selmana de les Lletres Asturianes, RTPA va emitir una programación especial onde destaca la estrena del documental dedicáu a Conceyu Bable “Conceyu Bable: entamar los llabores de casa” la nueche del martes 30 d’abril, a les 22:30 h; y depués “Onde soi quien quiero ser. Una semblanza d’Igor Medio” (martes 30 d’abril, a les 23:30 h); amás de la retresmisión en directo, el vienres 3 de mayu, a les 19.00 de la tarde, del actu institucional de l'Academia de la Llingua Asturiana con motivu del Día de les Lletres Asturianes nel Teatru Campoamor, qu’incluye l’entamu musical d'Eduardo Llosa García, l'acoyida de l'académica d’honor nueva Eva Buchi, les acoyíes de los académicos de númberu nuevos Pablo Rodriguez Medina y Claudia Elena Menéndez, el discursu institucional del presidente de l’Academia de la Llingua Asturiana, Xosé Antón González Riaño, y l’actuación musical d'Héctor Braga.
Los informativos van incluyir noticies n'asturianu. Conexión Asturias va tar nos actos de la Selmana de les Lletres que trescurran nel so horariu. Amás, vamos tener espacios nos programes pa la música y la lliteratura en llingua asturiana, y van emitise delles producciones a lo llargo de la selmana, como’l conciertu “La banda sonora de la oficialidá” (el vienres 3 de mayu, a les 00:00 h), el programa “D’Ayeri a güei” (los domingos a les 23:30 h), “Pieces" nel so horariu habitual, y el musical infantil “Historia d'un bosque”, de Nacho Fonseca, el domingu 5 de mayu a les 11:30 h.
La llingua asturiana tamién va tener protagonismu na programación de la radio autonómica asturiana, RPA. A lo llargo d'estes xornaes d'homenaxe a la nuestra llingua y cultura van emitise 20 pieces radiofóniques.
0 Comentarios
Esta noticia todavía no tiene comentarios
Comentar la noticia
El email no será publicado