Llanes entama un nuevu proyectu cultural: la X.O.T.A.

El Grupu Etnográficu L'Oriente de l’Asociación Cultural Llacín, xuntu al Ayuntamientu de Llanes y cola collaboración de la Conseyería de Cultura, Política Llingüística y Deporte del Principáu d'Asturies, entamen un nuevu proyectu cultural en Llanes: “La X.O.T.A.”, Xira L'Oriente Trad Alcuentru.

El proyectu consiste nun festival de música y baille que, inspiráu ena tradición oral, acueya dende las manifestaciones más próximas a la tresmisión hasta otras más creativas y vanguardistas.

Las fechas escoyías pal festival son el vienres 7 y el sábadu 8 de xunu. Pal vienres va ?acese en Porrúa un homenaxe a informantes de la zona, pa depués contar con un conciertu de 6 Riales, y escenariu abiertu siguiendo col baille tradicional.

El día grande sedrá'l sábadu. Entama pela mañana con un taller d'iniciación al baille gallegu con Miguel Sotelo ena villa de Llanes. Pela tardi, en La Portiella de Llanes, entamen Pandereteros d'Anguaño col so conciertu. Depués, tendrán llugar actuaciones de grupos de baille, con l'Andecha Folclor d'Uviéu, Asociación Cultural O Fiadeiro de Vigo y cola presentación del Grupu Etnográficu L'Oriente de Llanes. Darréu ?arase baille con artistas conocíos del panorama musical del folk asturianu. La X.O.T.A. pesllará colos conciertos de Draque (Asturies), Casapalma (Cantabria) y Omiri (Portugal).

La Xira ñaz col enfotu del G.E.L'Oriente de poner en valor la tradición oral, interpretándola como un ?echu cultural vivu susceptible d'usase de manera creativa amás de tener que cudiase pa la so conservación. Tamién tien l'oxetivu de dinamizar la música y el baille tradicional asturianu, creando espacios pa la participación de las xeneraciones mozas n’actividades rellacionadas col patrimoniu cultural.

La muyer como elementu fundamental ena tresmisión de la cultura tradicional, el feminismu, los argumentos ecolóxicos pa la conservación del mediu, el respetu a la diversidá, la normalización del usu de la llingua asturiana y la promoción de recursos pal desarrollu del mediu rural tarán como exa d'esti proyectu.

L'Alcuentru dispondrá d'un puntu violeta ena folixa.

Ena X.O.T.A. contaráse con carpa y puestos onde probar gastronomía de la zona, tamién con opciones veganas.

Ena semeya, Enrique Riestra, alcalde de Llanes, Priscila Alonso, conceyala de Cultura, Gerardo Gutiérrez Romano, presidente de la Asociación Cultural Llacín, y Santi Galguera, director del Grupu Etnográficu L’Oriente, el martes pasáu ena presentación de la X.O.T.A.