Exposición de Pablo Casanueva en Ribadesella

Comentar

NOTICIAS RELACIONADAS

Exposición de Pablo Casanueva en Ribadesella

Publicada por Redacción Búscolu el 01/07/2021 23:30:27

8 filmes sobre la guerra ye un proyeutu audiovisual de Pablo Casanueva nel que fae un acercamientu a la Represión Franquista nel Conceyu Ribeseya. Casanueva lleva trabayando nos caberos años na recopilación de datos, entrevistes y materiales entornu a la guerra civil y la posguerra qu’agora salen publicaos al traviés d’ocho pieces cinematográfiques.

Dempués de la  so estrena el 29 de mayu, que cuntó cola ponencia “L’arqueoloxía de la memoria” de Irene Faza,  arqueóloga y activista de la ARMH, la obra va exponese na sala d’esposiciones de la Casa la  Cultura. Tará dende’l día 1 de xunetu hasta’l 15. Podrán vese los ocho cortumetraxes, que tarán  expuestos en continuidá. La muestra tuvo presente el mes pasáu nel Centru d’Arte Rupestre de  Tito Bustillo. 

Pablo Casanueva entama la so rellacción cola imaxe al traviés de la pintura; sigue cola  fotografía y acaba nel cine. Dióse a conocer nel 2013 col estrenu de Bernabé, el so primer  llargumetraxe y el primeru en llingua asturiana, col qu’algamó un gran éxitu de públicu. Darréu,  estudia Comunicación Audiovisual na Universidá de Burgos y na Universidá del País Vascu en  Bilbao. El so discursu artísticu básase na memoria, familiar y coleutiva, y nel retratu identitariu de  la realidá asturiana. Ente les sos obres destaquen: La sele construcción de la memoria (2017) y  Escontra la casualidá (2018), dambes estrenaes nel Festival Internacional de Cine de Xixón nel  2018; Conserveres (2017), videocreación seleicionada nel festival LAN de Bilbao o’l cortumetraxe  musical Mensaxe pa la mocedá del Imperiu (2019). Anguañu alcuéntrase desarrollando la  esposición Xente (seleccionada nel Programa d’Exposiciones Jóvenes Artistas Plásticos Sala  Borrón) que verá la lluz en 2022.  

Nota del autor  

Na cuarentena pola COVID-19 tuve revisando los materiales que tenía y pensando una forma  afayaiza pa mostralos y ayudar al so espardimientu. Paecióme importante facelo por varios  motivos. El primeru: qu’eses hestories que tuvieron silenciaes nel discursu oficial a lo llargu de la  Dictadura Franquista y la posterior Transición pudieren ver la lluz y ser contaes. Per otru llau, dar  una amuesa de les realidaes que se dieron durantre n’aquellos años, dende un prisma común y  oxetivu, pa provocar una activación de la memoria particular na xente. Por últimu, disponer d’un  material audiovisual pa que la mocedá pueda consultar o trabayar sobre ello.

El formatu pensáu respuende a una estructura similar a la d’un discu de música. Compónse  d’ocho cortumetraxes en llugar d’ocho canciones. Puen escuchase, vese nesti casu,  individualmente, en conxuntu o arbitrariamente. Los filmes funcionen independientemente y caún  d’ellos cuenta una hestoria particular. De igual manera, toos ellos respuenden a un tema común.  L’oxetivu ye facer dos tipos de distribución col proyeutu. La presentación completa del álbum,  que tien una duración d’unos 30 minutos; l’usu particular d’un filme pa una charra, trabayu o  investigación; y la distribución online pa ser consultaos llibremente. 

Les pieces pretenden tocar los temes principales en rellación a la Represión Franquista y mostrar  el tipu de documentos o testimonios que se pueden topar y de qué manera reconstruyilos. Dende  la voz de los protagonistes na cabera carta de José Martínez na pieza Carta dende la carcel. De  segundes voces el testimoniu d’Evangelina, en La hestoria de Marianín, que fallecía l’añu pasáu.  Un fechu qu’evidencia la urxencia de captar esos rellatos. De tercera voz, Nos montes de Moru y  Sardéu, la reconstrución de los fechos en base a testimonios y documentos. Ye dicir, el resultáu  de la investigación. 

Les temátiques que se toquen van dende la cárcel, el fusilamientu, los fugaos a los asesinatos,  l’exiliu, el trabayu esclavu o la depuración social del Franquismu. Queden otres munches  realidaes ensin tocar como por exemplu el conflictu bélicu propiamente dichu, les foses comunes  o la censura. Preténdese tamién repensar el paisaxe del conceyu ya incorporar una llectura más  sobre él. Por exemplu, llanzar otra mirada a la ponte, construyida con mano d’obra esclava.  Recuérdanse los nomes de les 74 víctimes del Franquismu en Ribeseya. Pieslla l’album la pieza  La Banda de Música dende un puntu de vista más creativu.

¿Quiéres comentar? Identifícate o Registrate

También en El Búscolu