Selmana de les Lletres asturianes

Selmana de les Lletres asturianes

Publicada por Redacción Búscolu el 25/04/2016 21:37:44

La selmana de les lletres asturianes va cellebrase esti añu de manera especial nel conceyu de Villaviciosa con una serie d'actos rellacionaos cola nuestra llingua y lliteratura. La programación entama esti xueves, 28 d'abril a les 20:00 na Casa Los Hevia, cola presentación del númberu 19 de la revista Cultures, revista de cultura asturiana centrada na antropoloxía y la etnógrafía qu'edita l'academia de la llingua asturiana. Nel actu contaráse cola presencia del director de la revista, Roberto González-Quevedo, que va tar acompañáu de Xuan Pedrayes Obaya y Carme Pedrayes Toyos, autores de sendos artículos incluyíos na revista dedicaos al conceyu maliayu.

Otramiente, el vienres 6 de mayu, día de les lletres asturianes, procederáse en collaboración cola asociación La Compaña del Ronchel al tradicional repartu de lletres de pan per centros escolares y establecimientos del conceyu.

Pal día siguiente, sábadu 7 de mayu, a les 20:00 nel teatru Riera, tóca-y el turnu al teatru n'asturianu, cola representación en collaboración col Circuitu Asturianu d'Artes Escéniques de la obra Xuanín Namoráu pola compañía Nun tris. Esta obra ye una comedia orixinal de Federico Villoch, adaptada por Lluis Portal, xuguete llíticu de calter cómicu con númberos musicales d'ambientación cubana, desarrollando al empar el contestu de la emigración asturiana a Cuba a finales del sieglu XIX y entamos del XX. La entrada ye llibre.

Pa poner el ramu a esta riestra d'actos al rodiu de les nuestres lletres, el martes 10 de mayu, a les 19:00, na biblioteca del Conceyu de Villaviciosa y en collaboración cola Conseyería d'educación y cultura, va presentase'l cómic El viaxe a la lluz, de Ruma Barbero, obra ganadora del premiu Alfonso Iglesies de cómic na so edición de 2015. La obra ambientada na posguerra nel conceyu de Ponga, avérase a les histories de los fugaos que n'aquellos tiemos actuaben pela zona. L'escritor y músicu Boni Pérez será l'encargáu d'acompañar a l'autor y presentar la obra.

¿Quiéres comentar? Identifícate o Registrate

También en El Búscolu