Artículu d'opinión de Marcos A. Fernández n'InfoAsturies.

Saludaba va pocu l’aterrizaxe n’Asturies de la franquicia madrilana de Podemos, dende’l comencimientu de qu’el reencadarmamientu de la izquierda española n’Asturies aidaría a remover los cimientos del chiringu que tienen entamáu n’Asturies los políticos del réxime y vista la prosimidá en dellos plantegamientos políticos, tamién valoraba comu positivu “cualisquier cambiu que los ponga del nuesu llau nel procesu de normalización democrática tovía por facer nel nuesu país” amosando la nuesa dimposición a “collaborar con quien se comprometa col cambiu, ensin seutarismos que nun lleven a dengún llau, pero siempres dende la soberanía nacional asturiana”.

Llamentablemente esta nueva sucursal española n’Asturies non solo nun s’estrema un res no que cinca al fechu nacional asturianu, sinon que fasta agora ensiquiera nun reconoz el drechu a la Oficialidá de la llingua asturiana comu pasu primeru cara a algamar los drechos llingüísticos de los asturianos, con declaraciones non solo de Mª Eugenia Suárez, Secretaria Xeneral de Podemos en Gozón que raspien el facismu, sinon tamién de la eurodiputada Tania González ufiertando “debate “ en cuentes d’Oficialidá, les vergoñantes declaraciones de Daniel Ripa, nueu Secretariu Xeneral de Podemos nel nuesu país,  o la reiterada negativa a retrucar a una cenciella entruga que se-yos vien faciendo per pasiva y per activa: Oficialidá ¿Sí o Non?.

Bien, hai que dicir les coses clares: La Oficialidá ye lo mínimo. El compromisu con esta desixencia democrática marca la postrer llinia de lo almisible, quien nun se ponga del llau de la Oficialidá ponse al otru llau de la barricada, en frente de cualisquier asturianu que nun hebia perdío la dignidá de selo, en frente de cualisquier demócrata.

Y si yá ye imposible d’atalantar la postura de los “asturianistes” que pretenden facer pasar esta franquicia comu una alternativa nacional asturiana (?!!) pa xustificar un camín a dengún llau, la so participación con quien guarda un silenciu cómpliz cuandu se fala d’Oficialidá ponlos nuna situación de descréitu inreversible.

Cierto que básicamente son los mesmos que pidieron el votu pa Valledor, pa IU, qu’inclusu llegaron a formar parte del gobiernu d’Areces, y que la so credibilidá yá va tiempu que ta mui amenorgada, pero esta nuea renuncia colocaríelos nuna situación ensin torna. Yá nun se trata de que la so incoherencia política suponga un continu poner torgues al necesariu encadarmamientu d’una alternativa política asturiana con capacidá pa illusionar y rentabilizase elleutoralmente, p’avanzar na recostruición nacional y social d’Asturies. Non, la renuncia a la Oficialidá comu compromisu ciertu colos drechos llingüísticos de los asturianos colócalos del llau del enemigu, inevitable, definitiva y llamentablemente.

Marcos A. Fdez ye miembru de la Xunta Executiva d'Andecha Astur.