La organización distribúi una tabla esplicativa col programa sobre la oficialidá que lleva cada partíu pa les elecciones del 24-M.

La organización Iniciativa pol Asturianu ta acabante asoleyar un gráficu informativu cola postura que lleven los partíos nel programa electoral alredor de la oficialidá del asturianu. Nel gráficu apaez la postura positiva o negativa que lleven les que fueron les principales fuercies polítiques nes últimes convocatories electorales.

Iniciativa pol Asturianu celebra que la reivindicación de la oficialidá seya asumida cada vegada por más fuercies polítiques de tol espectru ideolóxicu y con cada vegada más pesu na Xunta Xeneral, lo que va construyendo añu a añu'l consensu políticu necesariu pa la oficialidá, ferramienta llegal imprescindible pa garantizar el futuru del idioma.

Y ye que la normalización, el reconocimientu de los drechos humanos de los falantes y el querer un futuru pa un elementu cultural de primer orde, ye una cuestión apartidista, que la sociedá asturiana tien asumida, como indiquen dende va más de diez años les encuestes, que falen de más d'un 60% de persones a favor de la oficialidá, recuerden dende Iniciativa pol Asturianu.

Como organización apartidista y nesi sen imparcial, nun pidimos el votu pa naide, pero sí pidimos a los ciudadanos y ciudadanes que tengan en cuenta la cuestión llingüística a la hora de votar, pues anque nun sedrá la única razón de votu pa munches persones, si ye cada vegada más un elementu perimportante y definitivu a la hora d'escoyer ente unes fuercies y otres.

Esta llexislatura sedrá importante pa la llingua asturiana, que tien una situación cada vegada peor y que precisa de midíes urxentes y d'un procesu de reforma del Estatutu d'Autonomía que lleve a la oficialidá, tal y como s'establez na Constitución y como vienen reclamando, sociedá, y entidaes y organismos internacionales dende va más de cuarenta años.