El pasáu vienres, 3 de xineru, el Vieyu Depósitu del Agua de Noreña acoyó la presentación del númberu 9 de la revista “N·Ast. Cartafueyos d·Ensayu”, na qu·intervenieren el direutor de la espublización, Daniel Cueli, y Toño Martínez, presidente de l·Asociación Cultural InfoNoreña, qu·entamaba l·actu a comuña cola Asociación Cultural N·Ast.

L·actu, aprovecháu tamién pa facer un repasu a la trayeutoria de la revista, cuntó con un bon garrapiellu d·asistentes, ente los que s·alcontraben Lola Suárez, presidenta de N·Ast; Marcos Fernández, xerente d·Espublizastur –que s·encarga de la xestión editorial de la revista–; Dulce Xil, es-xerente de la mítica Llibrería Paraxuga; Pablo Pérez, conceyal de CA en Noreña o Arturu Bermeyu, secretariu xeneral d·Andecha Astur.

Nesta novena entrega de los cartafueyos recuéyense los trabayos “Remanar la hestoria d·Asturies” (Xuan Porta); “Totalitarismu (os): notes sobre les sos carauterístiques cimeres y la so aplicación al facismu español” (Natalia Fernández); “La llucha de clases na Corona de Castiella” (Eduardo Abad y Sergio Alonso) y “El republicanismu federal na Asturies decimonónica” (Javier Cubero).

La revista, que tien un llargor de 118 páxines y un preciu de venta al públicu de 10 €, tará a la venta nes llibreríes Cervantes y Ojanguren (Uviéu) y Paradiso (Xixón) de magar el día 15 d·esti mes, anque tamién se pue pidir al traviés del corréu lletrónicu nast.oficialida@gmail.com.

D·otra miente, el periodista Naciu Varillas va entrevistar a Daniel Cueli al rodiu d·esti númberu nuevu de la espublización. Va ser esti martes que vien, 7 de xineru, a les 11·40 hores en “Naguando”, estaya n·asturianu del programa “El tren de RPA".