La plataforma de youtubers asturianos PlayPresta estrena esti martes un programa sobre´l campu asturianu

La plataforma de youtubers asturianos PlayPresta estrena esti martes un programa sobre´l campu asturianu

Publicada por Redacción Búscolu el 15/10/2018 23:08:29

PlayPresta, que tien tolos sos programes n'asturianu, lleva dende finales de 2017 emitiendo y suma yá más de 400.000 espectadores acumulaos

El nuevu programa de PlayPresta lleva por títulu La Casería y n'él, un rapaz llabriegu del conceyu de Siero, Saúl Molleda, va enseñar a los espectadores cómo ye la vida nuna casería, con toles xeres que se faen nel día a día de la vida rural asturiana. La Casería va percorrer acciones habituales y de forma amena y desanfadada, nos ente 3 y 5 minutos que dura cada capítulu, va enseñar acciones como trabayar col ganáu, cuidar les pites, facer sidra casero o segar.

Nesta seronda tán arrancando les nueves temporades de dellos programes de la plataforma, como La cla invisible, que suma a Diego Solís a les habituales presentaciones de Laura Marcos, #Tendencies, el programa de moda de Maggy que llega cola so esperada segunda temporada, CosPlayPresta, el programa de la cosplayer ShiroYchigo, y Viaxando, que vien percorriendo ciudaes como Zagreb, Ciudá del Cabu, Praga o Lisboa.

Entamaron tamién nuevos programes como la serie Bertucu Show, protagonizada por una marioneta con muncha retranca, Refritu, un formatu que toca temes actuales y variaos, siempres con un tonu d'humor.

Nestos tiempos nos que’l consumu televisivu faise cada vegada más al traviés de plataformes de conteníos colgaos na rede, PlayPresta quier afitase en referente pa la mocedá n’Asturies, convirtiéndose “nuna ventana al mundu de la nuesa xeneración, un espaciu pa entender qué ta pasando dende una perspectiva diferente”.

Nesti momentu la canal emite un programa cada día de la selmana y esta ye la intención de Cuatro Gotes Producciones, la empresa que ta detrás d'esti proyectu. "Cuntar con programes tolos díes y tratar temes varios pensaos pal públicu mozu, pero que lleguen a distintes xeneraciones y a públicos con gustos estremaos."

Na plataforma, que pue vese en Facebook, YouTube o na páxina web www.playpresta.com, amás de n’Instagram y Twitter, pueden atopase tolos conteníos colgaos hasta'l momentu.

¿Quiéres comentar? Identifícate o Registrate

También en El Búscolu