El conseyeru de Presidencia, Guillermo Martínez, apurrió esti mediudía los premios a los ganadores asturianos de la XX edición del Concursu Euroscola, que se desenvuelve a nivel nacional. L’oxetivu d’esti concursu ye informar a la mocedá sobre’l procesu d’integración europea y aguiyar la participación ciudadana na construcción de la UE. Al actu tamién foi la directora xeneral del Institutu Asturianu de la Muyer y Polítiques de Mocedá, Carmen Sanjurjo.

 

Convocáu pola Oficina d’Información del Parllamentu Européu n’España, en collaboración cola Representación n’España de la Comisión Europea y la Secretaría d’Estáu pa la Unión Europea, el tema central de la edición d’anguaño foi’l Parllamentu Européu, la so historia y la trescendencia que tienen les decisiones d’esta institución na vida cotidiana de los ciudadanos europeos.

 

El concursu propónse fomentar l’usu d’Internet como ferramienta educativa, informativa y comunicativa, y l’aprendimientu d’otra llingua, fundamental pa consiguir una Europa aunida. Por eso, el certame desenvuélvese en dos versiones llingüístiques: castellanu y inglés. El concursu desenvuélvese al traviés d’una plataforma interactiva educativa n’Internet: www.euro-scola.com.

 

Puen participar tolos centros d’Enseñanza Secundaria Obligatoria (ESO), Bachilleratu o Ciclos de Formación Profesional de Grau Mediu. Pa eso ye menester inscribise por  equipos, formaos por 10 alumnos, d’ente 15 y 18 años, y un profesor responsable, qu’asume la representación del grupu ante la organización d’Euroscola.

 

Los equipos asturianos premiaos anguaño pertenecen a estos centros: IES Leopoldo Alas Clarín (Uviéu); IES Santa Bárbara (Llangréu), Colexu Santu Domingu de Guzmán (Mieres) y Colexu Inmaculada Concepción (Xixón). Un grupu del institutu uviedín va viaxar a Estrasburgo, a la sede del Parllamentu européu, en representación d’Asturies, pa participar con otros mozos europeos nuna simulación del Parllamentu Européu pa la mocedá.