Intervención de la consejera de cultura, política llingüística y turismo

Publicada por Pressy el 24/09/2021 13:05:10

Comparezo énte ustedes a pidimientu propiu pa informar de tolo relativo a la Fundación Selgas-Fagalde. Acompáñame’l director xeneral de Cultura y Patrimoniu, Pablo León, y la secretaria xeneral técnica de la Conseyería de Cultura, Política Llingüística y Turismu, Andrea Suárez.

Déxenme señalar que la Fundación Selgas ye una fundación cultural de calter priváu, reconocida como tal por Orde de 4 de xunu de 1992 del Ministeriu de Cultura. Y de calter estatal, polo qu’esa fundación ta inscrita nel Rexistru de Fundaciones y sometida al control del Protectoráu de Fundaciones dependiente del Ministeriu de Cultura y Deporte. Como saben, soi patrona de la fundación en virtú del mio cargu como conseyera de Cultura del Gobiernu d’Asturies.

Hasta la fecha, respondí nesta cámara a preguntes de los señores diputaos relatives a esta fundación en cuatro ocasiones, una d’elles una comparecencia que se fixo nel mes de mayu pasáu. Y, como saben, en toes y caúna d’eses comparecencies, asumí los errores cometíos y espresé les mios disculpes. Y tamién espliqué les acciones que taba llevando a cabu per un llau dientro del patronatu como me correspuende como patrona y per otru llau dende la Dirección Xeneral de Cultura y Patrimoniu de la Conseyería de Cultura nes competencies qu’esta tien.

Nesta comparecencia gustaríame volver cuntar, n’orde cronolóxicu, la mio participación nel patronatu d’esta Fundación y cómo foron asocediéndose los acontecimientos nos últimos meses.

Como patrona, asistí pela primer vez a una xunta del patronatu’l 21 de mayu del 2020 celebrada en formatu de multiconferencia telefónica. Nel orde del día había un puntu 4 denomináu “Posibles efectos de la crisis del COVID-19 nel segundu trimestre del 2020”. Llegáu’l momentu de tratalu, fálase de la venta d’eses obres d’arte como daqué yá alcordao en xuntes previes del patronatu y que la Presidencia de la Fundación va siguir neses xestiones.

Nel mes de payares convócase otra xunta que nel so orde del día apaez un puntu 3 denomináu “Ratificación del alcuerdu de venta de les obres de Goya y Greco (Aníbal – Ascensión o Inmaculada) y la so declaración de nun ser bienes adscritos a la dotación de Fundación Selgas-Fagalde”. Llamentablemente, y anque la mio previsión yera sasistir, por cuenta d’una xunta d’urxencia pa tratar la crisis del COVID 19 nel Gobiernu d’Asturies al que pertenezo, nún de los momentos más difíciles de la pandemia, nun pudi asistir y efectué una delegación xenérica de la mio representación na Presidencia del patronatu.

Previamente, pidiendo información al presidente de la Fundación, he de dicir qu’esti esplicáreme per un corréu electrónicu que’l cuadru de “La Inmaculada” nun formaba parte de la colección que s’atopaba na Quinta y remitiéreme a alcuerdos de venta yá aprobaos pol patronatu.

Sicasí, vistos los acuerdos algamaos nesa reunión y n’efectuando una serie de consultes p’asesorame que discrepaben de la información dada pola Fundación, el miércoles 25 de payares unvié una carta al presidente amosando la mio intranquilidá y manifestando que como patrona de la Fundación nun podía dar la mio conformidá a una decisión de venta.

Darréu púnxose en conocimientu del Ministeriu copia d’esa comunicación nun corréu electrónicu con fecha de 9 d’avientu porque’l día 17 diba reunise la Xunta de Calificación, Valoración y Esportación de Bienes del Patrimoniu Históricu que diba tratar la posible esportabilidá del cuadru d’El Greco. Y queríemos que nesa xunta constare la posición contraria del Gobiernu d’Asturies, manifestada al traviés de carta por mi, como patrona. Como finalmente asina foi.

Nesi momentu, dende la Conseyería empecemos a valorar la posible declaración como Bien d’Interés Cultural, anque pa eso ye menester cuntar con informes qu’avalen esa propuesta énte la Comisión Permanente del Plenu de Patrimoniu y luego ante’l Plenu del Conseyu de Patrimoniu, tal y como pasó va dos díes cuando, como saben, s’aprobó la incoación del expediente BIC.

Asina xineru de 2021, y ante la necesidá de conocer qué obres de la Fundación Selgas-Fagalde pertenecíen a la dotación fundacional, la Dirección Xeneral de Cultura y Patrimoniu lo que fixo fue solicitar a la Fundación un inventariu de los bienes. Esti pidimientu, repitíu n’otres dos ocasiones, nun s’atendiere hasta ayer, alegando hasta agora la Presidencia de la Fundación qu’estes obres nun tán vinculaes a la Quinta nin a Asturies y, por eso, Asturies nun tien la competencia de declarales BIC.

No qu’a mi se refier como patrona, y énte la imposibilidá d’esclariar les duldes suscitaes a partir de los propósitos de venta d’estes dos obres de la Fundación, tampoco nun tuvi respuesta satisfactoria a les mios preguntes sobre la dotación fundacional y la pertenencia o non d’estos cuadros a la mesma tamién hasta’l día d’ayer en que recibo tamién dalguna documentación relevante.

Nesti mediu tiempu, siguí pidiendo esplicaciones al traviés del so presidente, que me siguió argumentando, per un llau, que nin el Goya nin el Greco formaben parte del capital fundacional, que nun había nada irregular na so venta nin suponía nenguna perda p’Asturies al nun ser bienes dotacionales y que l’alcuerdu de venta de les obres realizárese años atrás en xuntes del patronatu.

Por eso, el 30 d’abril pasáu volví unviar una carta espresando que, anque m’esplicaren que los cuadros mentaos yeren bienes patrimoniales que nun pertenecen al capital fundacional, nun podía dar el preste a la venta de nenguna de les obres y que taba esmolecida por conocer con detalle’l conteníu de les colecciones artístiques, bibliográfiques y ornamentación que compriende’l conxuntu conocíu como “La Quinta” y a los que se refieren los estatutos orixinales de la Fundación como parte del capital fundacional o de dotación, de calter non nayenable absolutamente. Por eso, nesa carta solicité-y l’inventariu o documentu de catalogación del que dispunxere la Fundación y qu’acreitare que los cuadros mentaos nun s’atopaben dientro del capital fundacional. A esta solicitú, la Presidencia de la Fundación contestó indicando que l’únicu bien que configura la dotación de la Fundación Selgas-Fagalde ye un local comercial asitiáu en Madrid. Y pa meyor conocimientu de la Fundación unviáronme cinco llibros publicaos pola mesma sobre’l so conteníu cultural. Tengo que dicir que nel mio casu, como patrona, nun recibí tal inventariu hasta’l momentu.

Dao que la siguiente xunta del patronatu tenía que celebrase llueu, lo que solicité al presidente de la Fundación actu siguíu fue que nesa xunta tratare’l conteníu d’estes cuestiones que-y fore treslladando per carta.

Asina, na xunta celebrada’l 21 de xunu del 2021 en Madrid, manifesté estes cuestiones, ente otres, poniendo en conocimientu del patronatu l’alcuerdu de la Comisión Permanente del Plenu de Patrimoniu Cultural d’Asturies d’unviar al Plenu la posible incoación d’espediente de declaración BIC de tol conxuntu de la Quinta, amás de les colecciones que guarda. Aparte, nun voté a favor de l’aprobación de les cuentes del añu 2020, y solicité la realización d’una auditoría esterna y independiente. Esta solicitú volví repetila per carta’l 31 d’agostu pasáu, reforzada pola esmolición provocada poles noticies tan inquietantes publicaes en prensa sobre la situación de la Fundación y que faen referencia a operaciones realizaes munchos años atrás.

Igualmente, repetí a la Fundación el mio pidimientu de los estatutos vixentes (dao que quería asegurame de toles posibles modificaciones que sufrieren nos trenta años de vida de la fundación), del inventariu, el contratu y precontratu de venta del cuadru de Goya, amás de les actes de les xuntes del patronatu dende la constitución de la Fundación hasta l’actualidá.

Al respective de la Dirección Xeneral de Cultura y Patrimoniu, a lo llargo del 2021 la Dirección Xeneral de Cultura y Patrimoniu realizó dellos pidimientos a la Fundación Selgas-Fagalde pa que facilitare copia del inventariu de la so colección artística, hasta ayer ensin resultaos satisfactorios. Esti pidimientu, a entender de la Conseyería y tamién a entender del Plenu del Conseyu de Patrimoniu Cultural d’Asturies qu’antiayer aprobó incoar l’expediente de protección BIC va dos díes, ye imprescindible pa poder conocer con precisión la llista de bienes que formen parte de les colecciones de la Quinta d’El Pitu y, polo tanto, son susceptibles de ser protexíos como Bienes d’Interés Cultural pol Conseyu de Patrimoniu Cultural d’Asturies.

Nes socesives comunicaciones teníes pola Dirección Xeneral cola Presidencia de la Fundación, dende la mesma vieno manifestándose que la colección d’arte, sacante los tapices, adscríbese al domiciliu social de la Fundación en Madrid. Y asevérase que “nenguna adquisición, distinta al moblame y los tapices, se realizaron les sos compres pa la conformación de La Quinta (quitando los tapices y la Ilesia de Xesús de Nazarenu)”. Al empar, insístese en que la fundación ye d’ámbitu nacional con dependencia del Protectoráu del Ministeriu de Cultura.

Estes afirmaciones entren en contradicción, por exemplu, cola Orde Ministerial de 4 de febreru del 2021 que se notificó a la Dirección Xeneral de Cultura y Patrimoniu con fecha de 20 de mayu del 2021, que declara la inesportabilidá de la obra “Inmaculada Concepción” d’El Greco y que requier a la comunidá autónoma d’Asturies a declarar esti cuadru Bien d’Interés Cultural o categoría de protección análoga, anque nesa fecha, como saben, el Conseyu de Patrimoniu Cultural yá adoptare una decisión a esi respectu.

Dada la negativa de la Fundación Selgas-Fagalde a facilitar la información, nos últimos meses la Dirección Xeneral tuvo analizando la documentación y les publicaciones existentes sobre esa colección y la so vinculación cola quinta d’El Pitu, la mayor parte de les mesmes editaes pola propia Fundación Selgas-Fagalde y, por cierto, unviaes pola Presidencia a mi va malapenes unos meses pa que pudiere conocer el conteníu de les colecciones.

Del so estudiu, la Dirección Xeneral conclúi que sí ye competente pa empezar el procesu de valoración patrimonial que llevó agora al pronunciamientu del Conseyu del Patrimoniu Cultural d’Asturies y ellabora los informes sobre los que se sustenta hoi la conveniencia de l’aplicación d’un nivel de protección a la colección en cuantes que colección o a dalgún de los sos bienes integrantes. En tou casu, y pa siguir la tramitación d’esi espediente, solicitó del Protectoráu de Fundaciones una serie de documentación relativo a la Fundación Selgas-Fagalde y yá nos comunicó que con fecha 3 d’agostu solicitaron de la Fundación una valoración de bienes realizada por espertu independiente. Amás, va dos díes remitió, proveniente del rexistru de fundaciones del Ministeriu de Xusticia, copia de los estatutos vixentes colos cambios nel domiciliu social de la entidá, certificáu de la dotación fundacional de la Fundación qu’asciende a 300.506,05 euros y la indicación de que les cuentes de los exercicios 2019 y 2020 tán en fase de subsanación.

Nel mio casu, como patrona, dada toa esta situación en que pasaron meses sin ver esclariaes les cuestiones que treslladé a la Fundación y entendiendo que los pidimientos que como patrona realicé nun s’atendieron, tamién punxi en conocimientu del Protectoráu toes estes circunstancies pa qu’adoptare les midíes oportunes y que valorase, en tou casu, la posibilidá d’aplicar l’artículu 42 de la Llei de Fundaciones (relativu a la intervención temporal) a la Fundación Selgas-Fagalde cola mira de comprobar la so situación real actual y analizar les decisiones adoptaes nos últimos tiempos como les relatives a les mentaes obres d’arte d’El Greco y Goya, les inversiones realizaes nos últimos años por patronos cola propia fundación y conocer si esti Protectoráu autorizó a dalgún patronu o miembru del patronatu a cobrar por servicios a la Fundación.

Como saben, el mesmu ministru de Cultura yá explicó en dos ocasiones que se ta analizando la situación y en casu d’apreciar cualquier irregularidá va acudir a la xusticia.

Mentestanto, señores diputaos y diputaes, siguimos trabayando, ente otres cuestiones na incoación del expediente de protección BIC, y seguimos insistiendo pa recabar la información y treslladar al Protectoráu competente les inquietúes qu’existan pa que faiga les averiguaciones oportunes nel exerciciu de les sos competencies y tome les midíes que considere.

Como-yos adelantaba antes, hoi puedo informa-yos de que nel día d’ayer la Dirección Xeneral recibió un documentu fecháu nel 22 de setiembre de 2021 col nome de “Inventariu-Colección Artística Fundación Selgas-Fagalde” onde se relacionen obres pictóriques pertenecientes a la Quinta y otres que nun perteneceríen a la mesma, casu, según esti documentu, de “La Inmaculada” d’El Greco.

Asinamesmo, nel día d’ayer yo recibí un documentu que solicité a la fundación: la escritura de compraventa del cuadru de Goya, y con él, amás de los estatuos vixentes, la tasación fecha d’esti cuadru en mayu del añu 2020. Sobre ambos documentos, lo que-yos puedo treslladar ye que la tasación fala d’una valoración nel mercáu nacional qu’oscilaría ente los dos millones y mediu y los tres millones. Y que la escritura notarial de compraventa del cuadru, indica que’l Goya procede y fue adquiríu pola Fundación el 22 de xunetu de 1992, en virtú d’herencia de doña Manuela Falgade, datu que ye relevante teniendo en cuenta que la constitución de la Fundación, cola so correspondiente dotación fundacional, fue en 1991.

Esta ye, señores diputaos, la situación en que nos atopamos nesti momentu. Esperamos siguir recibiendo la información solicitada y siguiremos analizando la que tenemos pa aclariar les dudes suscitaes. Como ven, nun ta siendo cenciello, pero va avanzándose. Nun-yos quepa duda de que, en casu de que se comprobaren ilegalidaes, se van estudiar les acciones oportunes.

Estimando la so atención, quedo a la so disposición pa contestar les preguntes que-yos paezan oportunes.

Ver en formato original (pdf: 123 Kb)

¿Quiéres comentar? Identifícate o Registrate

También en El Búscolu