El representante de la formación morada denunció, ente otres coses, el pocu compromisu del Gobiernu asturianu na llucha contra’l despoblamientu d’Asturies y recordó que «nosotros presentamos quince midíes pa incorporar al Plan Demográficu. Dalgunes de les más importantes son la gratuidá y estensión de la rede pública del 0 a 3, estableciendo’l progresivu aumentu de les escueles, con especial énfasis nel mediu rural. Propunximos proyectos pilotu de renta básica, avanzar hacia la erradicación de les llistes d’espera nel sistema públicu de dependencia y na ayuda a domiciliu, apoyando a les families asturianes nel cuidáu de les persones dependientes, y apostando pola so inclusión nel sistema públicu con salarios dignos pa les trabayadores».

Otra actuación planteada nesi sentíu ye la de «avanzar hacia polítiques de vivienda pública que permitan doblar el númberu de viviendes d’alquiler social y que pongan especial énfasis na vivienda pa la mocedá». Estes y otres propuestes, «incluyendo midíes de desestacionalización turística o abonu de matrícules universitaries, formen parte d’una visión integral de la crisis demográfica que nos diba permitir abordar de frente un problema estructural de la sociedá asturiana».

Enrique López refirióse tamién a les llistes d’espera sanitaries y aseguró que «la Conseyería de Sanidá ta treslladando a la población, o intentando treslladar, la falsa idea de que se pueden reducir les llistes d’espera por arte de maxa, publicando un decretu, ensin presupuestar más medios humanos y ensin que les derivaciones que promete supongan nuevos recursos». Alvirtió de que «les derivaciones a la sanidá privada y a la concertada nun pueden ser la solución a llargu plazu, porque son más cares y de peor calidá».

Por otra parte, faló de la falta de voluntá del Gobiernu de la FSA pa llegar a acuerdos, enumerando escenarios: «Opúnxose a la gratuidá del ciclu educativu de cero a tres años, opúnxose a duplicar en doce años el Parque de Vivienda Pública, opúnxose a la limitación de salarios de los altos cargos, opúnxose a subir l’Impuestu de Patrimoniu a les grandes fortunes, opúnxose a reforzar la contratación d’orientadores llaborales». Del mesmu mou, añadió que «s’oponen a parar les privatizaciones de servicios públicos, qu’imponen de manera creciente, empeorando la calidá de les prestaciones pese a tener un mayor coste, mientres bloqueen la ufierta d’empléu públicu de 2018, impidiendo que miles de paraes y paraos puedan optar a unes places necesaries pa los nuestros servicios públicos». Asinamesmo, denunció que l’Executivu de Javier Fernández mantién l’Alministración asturiana «atestada de nomamientos a deu, insubordinándose con esta cámara, negándose a convocar los concursos de puestos de trabayu a los que la llei oblíga-yos y que les sentencies xudiciales-yos esixen».

Frente a too eso, el portavoz parlamentariu dixo que dende Podemos Asturies esta llexislatura «llogramos desbloquear la Oficina Anticorrupción, impulsamos con éxitu la comisión d’investigación de les llistes d’espera, siguimos impulsando la del ERA, llogramos que se reduza a la metá la matrícula na etapa educativa de cero a tres, abrimos la reforma del Estatutu d’Autonomía, consiguimos la recuperación de la semana llaboral de 35 hores na Alministración, consiguimos que s’aprueben midíes pa que les empreses contratantes s’axusten a cláusules sociales…».

Enrique López concluyó’l so discursu, fechu dafechu n’asturianu, asegurando que «impulsamos tou tipu d’iniciatives parlamentaries y acudimos con honestidá a tres negociaciones presupuestaries, siempre col oxetivu d’algamar un acuerdu que representara los intereses de la mayoría social asturiana». Y dexó claro que «vamos volver a facelo, porque’l mio Grupu Parlamentariu nun da la llexislatura por acabada».