El Parque Nacional de Picos d'Europa entama mañana una xornada pa presentar los resultaos del proyectu d'investigación Geocave, que se va celebrar nel centru d'interpretación del parque Casa Dago, en Cangues d’Onís, a partir de les 11:00 hores. Al actu van asistir, ente más otros, el director xeneral de Recursos Naturales, Manuel Calvo, y el director de la parte asturiana del parque, Rodrigo Robledano.

Montserrat Jiménez Sánchez, profesora titular de la Universidá d'Uviéu, y l'investigador Daniel Ballesteros, van ser los encargaos de dar a conocer los resultaos del trabayu Caracterización geomorfológica y geocronológica de cavidades kársticas en el Parque Nacional de Picos de Europa (Geocave). L'estudiu, realizáu ente 2012 y 2016, foi financiáu pol Organismu Autónomu de Parques Nacionales y el Ministeriu d'Agricultura, Alimentación, Pesca y Mediu Ambiente.

La finalidá d'esta iniciativa ye la puesta en valor del patrimoniu xeolóxicu venceyáu a les cueves, una de les traces más singulares del Parque Nacional de los Picos d'Europa, que malapenes yera conocíu dende'l puntu de vista científicu. Pa ello estudiáronse dos cueves fondes de la redolada de los llagos de Cuadonga, na vertiente asturiana del macizu occidental. Nelles aplicóse una metodoloxía de trabayu multidisciplinar y innovadora, adaptada a la complexidá del mediu soterrañu de Picos. Esti sistema incluyó la ellaboración de mapes xeomorfolóxicos soterraños, la creación de modelos tridimensionales de les cueves, l'análisis de la estructura xeolóxica y la realización de dataciones polos métodos de desintegración radiométrica del uraniu-torio y de luminiscencia óptica estimulada (OSL).

L'estudiu dexó asitiar l'orixe de les cueves del parque ente 1 y 4 millones d'años d'antigüedá. La so evolución tuvo condicionada pola complexa estructura xeolóxica de los Picos d'Europa y la formación de la garganta del ríu Cares. Asina, dende va dellos millones d'años, esti caudal foi encaxándose nel relieve y provocando’l descensu progresivu de los niveles d'agües soterrañes, lo que, de la mesma, dexó'l desenvolvimientu de torques cada vez más fondes.

Ente 225.000 y 145.000 años atrás, les cueves fueron rellenaes por espeleotemes y sedimentos de ríos soterraños. Estos sedimentos formáronse pola erosión de les arenisques que nel pasáu cubrieron les calices del parque. La mayor parte del rellenu sedimentariu de les cueves erosionó fai ente 125.000 y 45.000 años, dexando que les cavidaes puedan ser esploraes anguaño polos equipos espeleolóxicos. Al empar, los glaciares cuaternarios condicionaron l'apaición de sedimentos nel interior de les cueves, similares a les varves típiques de llagos glaciares, de gran interés nos estudios paleoclimáticos.

El trabayu dexó xenerar per primer vegada una base de datos cartográfica y científica de les cueves del parque, amás d’un catálogu de formes del so mundu soterrañu. Esta información refuercia'l papel del mediu kárstico del sosuelu nel conxuntu del patrimoniu natural del parque y puede ser directamente aplicable a la xestión y caltenimientu del espaciu protexíu.

L'equipu d'investigación tuvo formáu tamién polos profesores Joaquín García Sansegundo y María José Domínguez Cuesta; la investigadora Laura Rodríguez-Rodríguez y la xeóloga Belén Naves, toos ellos miembros del Grupu d'Investigación GeoQuo de la Universidá d'Uviéu. Tamién participaron el científicu titular del CSIC, Santiago Giralt (Institutu de Ciencies de les Tierra Jaume Almera, de Barcelona), y la xefa d'Unidá del Institutu Xeolóxicu y Mineru d'España n'Uviéu, Mónica Meléndez.