Sofía Castañón  Coordinadora Autonómica de Podemos Asturies Rafael Palacios  Portavoz de Podemos Asturies na Xunta Xeneral

Dende Podemos Asturies tomamos mui en serio’l papel que nos correspuende cuando falamos de responder al naguar de la sociedá asturiana, d’escribir les páxines sobre les que construyir el futuru de la nuestra tierra. Poro, venimos faciendo por caltener una actitú constructiva énte les demandes y prioridaes de los distintos interlocutores na reforma del Estatutu d’Autonomía d’Asturies, y facemos particularmente por comprender el papel escomanáu que vien a xugar Foro. Una fuercia con un solu diputáu pero imprescindible na aritmética parlamentaria, y qu’al empar presenta la esixencia de que cedamos en delles cuestiones más alló d’onde nos sentimos cómodes les esquierdes.

El consensu y la correlación de fuercies son elementos lóxicos y hasta saludables d’una negociación como esta, na que tien xacíu satisfacer les aspiraciones d’una mayoría lo más amplia posible de la sociedá asturiana. Lo que nun tien xacíu ye mover la portería cada vez que-y vamos pegar a la pelota si ye que se tien una voluntá real d’alcuerdu.

Estender la esixencia d’una mayoría reforzada de trés quintos a la futura llei que desendolque’l nuestru modelu d’oficialidá yá yera una esixencia abegosa y ensin precidentes, una que sicasí aceptamos bien llueu por responsabilidá y conciencia de la necesidá d’avanzar. Coles mesmes, igual que les compañeres d’Izquierda Xunida, tamos dispuestes a nun poner torgues a munches de les peticiones que tresllada Foro en cuanto a infraestructures y polítiques demográfiques, magar que toes elles escapen al ámbitu específicu del testu estatutariu. Nun pue quedar dulda de la nuestra bona predisposición.

Agora, cuidamos qu’una ventisieteava parte de la negociación tien que tener tamién cierta conciencia de les llendes de la so capacidá pa esixir, sobremanera énte 26 diputaos y diputaes a la esquierda del arcu parlamentariu. Nun pue ser que depués d’aceptar una llinia colorada tan comprometedora como los trés quintos venga detrás una reforma fiscal -nuevamente ayena a lo estatutario-, y depués quién sabe qué más, too ello mientres cuerre’l calandariu y siguimos ensin concretar los conteníos que sí tienen de ser parte de la reforma.

Un Estatutu d’Autonomía ha de tratase cola seriedá propia d’un testu nel que se fundamenta la naturaleza política d’Asturies. La oficialidá de la llingua asturiana ha de tratase cola responsabilidá que merez una llucha cívica de décades. Y una negociación parlamentaria alredor d’estes cuestiones ha d’abordase con honestidá ente les fuercies implicaes si hai voluntá política p’algamar alcuerdos.

Nestes coordenaes entren la flexibilidá, la xenerosidá y los compromisos. Pa toles partes. Non el troquéu nin el xantaxe. Tenemos ente nós la oportunidá hestórica de dignificar l’estatus políticu del país y especialmente de les nuestres llingües. Sabemos qu’Adrián Pumares ye sinceru como nós na so voluntá d’algamalo, y coincidimos tamién en qu’hai otres munches cuestiones urxentes que necesita Asturies y al marxe de lo que cabe nel Estatutu. Pero más alló de lo retórico y lo performativo, la realidá material ye que pa reformar esti testu fundamental hai que tener un alcuerdu no que queda del mes de xineru o, si non, la ventana d’oportunidá va zarrase. Si nun somos quien, perdemos toes, pero la que más pierde ye Asturies. Toca tar al altor y por nós nun va quedar.

???? Es motivo de orgullo que en Asturies no haya ni una sola macrogranja. El modelo de ganadería extensiva, mayoritar… t.co/wkAWUDx3KL

???? La fiscalidá nun ye materia de negociación estatutaria. Foro sábelo pero insiste plantegando un alderique que'l s… t.co/hMcjgZoi6q

???? Los y las pequeñas hosteleras siguen siendo discriminadas por el Gobierno de Asturies, quien sólo atiende a las r… t.co/0Dd1uBFkrz