Andecha Astur amiéstase a la convocatoria de Conceyu Abiertu

Andecha Astur decide amiestase a la convocatoria de cellebración del Díi de la Nación Asturiana rializáu por Conceyu Abiertu al empar que llamenta l·ausencia d·una movilización activa nesti díi.

Díi de la Nación Asturiana

Andecha Astur amiéstase a la convocatoria de Conceyu Abiertu
Andecha Astur decide amiestase a la convocatoria de cellebración del Díi de la Nación Asturiana rializáu por Conceyu Abiertu al empar que llamenta l·ausencia d·una movilización activa nesti díi.

Andecha Astur considera especialmente dolioso que dempués de cerca de 20 años de movilización ininterrumpío nel Díi de la Nación Asturiana, dexe de rializase esti añu, precisamente nunos intres nos que más necesario ye una rempuesta en clave asturiana y d·izquierda a les polítiques del Estáu español sobro Asturies.

Pesia ello, Andecha Astur, en coherencia col so firme apueste por algamar la xunidá d·aición del nacionalismu asturianu, renuncia a convocar en solitariu dengún actu, pa evitar que puea ser interpretáu en clave de protagonismu y torgar les necesaries rellaciones xunitaries ente les formaciones de la izquierda nacionaliega asturiana, y nel comencimientu de que nes circustancies d·anguañu, denguna movilización que nun sirva p·avanzar nesa xunidá d·aición non solo nun resulta útil, sinon que pue resultar perxudicial. Nesi sen, decide amiestase a la convocatoria rializada por Conceyu Abiertu, al atalantar que se trata de la convocatoria más plural y que meyor espeya l·espíritu de la nuesa organización.

A la fin, Andecha Astur fai un llamamientu al conxuntu de formaciones polítiques y sociales asitiaes nel ámbetu del nacionalismu asturianu a qu·aprofiten la cellebración del Díi de la Nación Asturiana pa reflexonar sobro la necesidá de superar l·actual situación de desunión esistente que mos impide responder cola fuercia precisa a les contines agresiones nel tarrén social y nacional de les que somos oxetu por parte del Estáu español.

06 de setiembre de 2012

Fdo.- Arturu Xosé Bermeyu García
Secretariu Xeneral d·Andecha Astur