Entrevista a Iván Llera presidente d'Iniciativa pol Asturianu

El pasau 7 de mayu, celebrose'l día de les lletres asturianes. L’añu pasau tuvimos la oportunidá de entevistar a Inaciu Galán expresidente d'Iniciativa pol Asturianu y miembru de la directiva actual. Nesta ocasión sentámonos con Iván Llera a charrar y compartimos con vosotros esta entrevista.

[Redacción El Búscolu]: Buenes Iván. Lo primeru de tou gracies por responder la nuesa entrevista. Pa entamar gustaríanos que nos falases un pocu de ti enantes metenos de llenu nel tema del asturianu.

[Iván Llera]: Munches gracies a vosotros pol interés. Soi una persona normal y corriente y, fundamentalmente, una bona persona, que nun ye poco. Allegre, amigu de los mios amigos… Y como me tira la sangre pongueta, tamién dalgo neciu.

[RB]: Sabemos que de formación yes periodista, ¿Qué te llevó a escoyer esa carrera y non otra?

[IL]: Siempres lo tuvi claro. Dende bien pequeñu yá falaba de que quería ser presentador de televisión, que ye como entendía yo daquella eso de ser periodista. Prestábame lleer el periódicu, veía les noticies y siguía los Plenos del Conceyu en TeleXixón… Inclusive xugaba a crear parrilles de canales de televisión qu’inventaba. Cuando crecí nun lo duldé.

[RB]: Si repasamos la to trayectoria profesional, vemos que trabayaste años na competencia (bono, nun creemos que El Comercio nos considere competencia… jajaja) ¿Cómo foi la to experiencia trabayando elli?

[IL]: Mui gratificante. Soi de Xixón, polo qu’entrar a formar parte del periódicu de la mio ciudá foi un arguyu. Dende’l primer momentu tuvi tola confianza del mundu pa facer de too y en tolos soportes: prensa escrita, web y multimedia. Foi una etapa intensa, pero mui arriquecedora profesionalmente. Y tamién no personal. Ye una familia.

[RB]¿Tuviste munchos años?

[IL]: En total, 7 años. Llegué durante’l branu de 2012 como becariu del Máster de Periodismu Multimedia que fici en Bilbao y quedéme.

[RB] N’actualidá constanos que trabayes en Cuatro Gotes Producciones. ¿A qué vos dedicáis?

[IL]: Ye una empresa integral de comunicación. Tuvi trabayando con ellos una temporada en distintos proyectos. El documental ‘Elles: muyeres na lliteratura asturiana’, el programa de televisión ‘Mundu Sidreru’ y, fundamentalmente, como redactor de la revista ‘Ver Asturies’. Agora sigo collaborando con ellos faciendo una sección de televisión nel programa ‘Sentir Asturies’.

[RB]: Cuando nun tas trabayando ¿qué te presta facer?

[IL]: Considérome una persona bastante casera. Préstame lleer, ver series… Y al tiempu soi tamién una persona activa. Lo que más echo en falta agora ye poder viaxar, que suel ser la mio vía d’escape de la rutina y l’estrés.

[RB]: Qué platu asturianu escoyeríes…

[IL]: Hai dellos, pero si tuviera que quedame con unu probablemente sería el pote de berces. El que fai mio güela, a ser posible.

[RB]: Un llugar d’Asturies nel que te preste perdete.

[IL]: Si dalgo toi sacando en positivu d’esti tiempu que nos ta tocando vivir ye una escusa pa conocer meyor Asturies. Especialmente pa percorrer l’Occidente, que ye lo que tenía más pendiente. De toes maneres, barro pa casa y quédome con Ponga. Mios padres son d’ellí y ye onde pasaba los branos de guah.e. El paisaxe ye impresionante.

[RB]: Güei celébrase el Día de les Lletres Asturianes. ¿Cómo o cuándo entamasti a interesate pola cultura asturiana?

[IL]: Siempres tuvi curiosidá por ella. Ye la llingua que sentí en casa polo que-y tengo un cariñu mui especial. Sicasí, podría dicise que foi nel momentu de colar a estudiar a Madrid cuando entamé a interesame más por ella. Estudié les normes ortográfiques de l’Academia, entamé a lleer prensa y llibros n’asturianu y a meteme un poquiñín nesi círculu.

[RB]: Actualmente yes el presidente d’Iniciativa pol Asturianu. ¿Dende cuándo formes parte de la asociación?

[IL]: Como simpatizante, dende l’entamu; como sociu de plenu derechu, dende unos meses más tarde. Ficeme sociu un 29 d’ochobre de 2017, siendo’l sociu númberu 47. Daquella taba faciendo’l máster y nun disponía de tantu tiempu. En cuantes qu’entamé a trabayar formalicé la mio inscripción.

[RB]: Pa los que no conozan Iniciativa pol Asturianu, cuéntanos un pocu les llabores que facéis, a qué vos dedicáis.

[IL]: Iniciativa pol Asturianu nació nun momentu nel que percibíemos qu’había cierta desilusión nel movimientu de reivindicación llingüística. Intentamos trabayar siempres en positivu y col enfotu de siguir sumando persones al consensu pol futuru del asturianu. L’oxetivu ye la oficialidá, pero nun arrenunciamos a dar pasos alantre en nengún ámbitu. Por eso fuimos hasta Madrid en delles ocasiones pa pidir una partida pa l’Academia de la Llingua nos Presupuestos Xenerales del Estáu. Costó, pero consiguióse. Movémonos muncho nel ámbitu de la normalización nos conceyos, collaboramos con otres organizaciones de reivindicación llingüística del Estáu y formamos parte del Conseyu Asesor de Política Llingüística del Gobiernu asturianu y del Conseyu Asesor de Xixón. Ente otres munches coses.

[RB]: ¿Cuál ye “la directiva” de la asociación? ¿Tienes un equipu buenu?

[IL]: ¡El meyor! En total, somos quince persones trabayando en distintes árees, anque ayudámonos toos en too. Hai xente qu’entró nueva y xente que yá venía trabayando na directiva dende l’entamu, comenzando por Inaciu Galán, qu’aceptó siguir formando parte del equipu directivu como vocal de Rellaciones Institucionales ya Internacionales. Ye un lluxu.

[RB] ¿Cuántos socios sois en la actualidá?

[IL]: Alredor de mediu millar. Y prestaríanos que se sumara más xente. Aprovecho pa convidar a toles persones que se sientan identificaes col nuesu llabor a que se xunan a Iniciativa pol Asturianu y nos ayuden a trabayar pa siguir dando pasos alantre na normalización del asturianu. Ensin ellos nun sería posible.

[RB]: ¿Cómo puede uno facese sociu o collaborar cola asociación?

[IL]: Ye mui cenciello. Basta con entrar na nuesa páxina web (www.iniciativapolasturianu.org) y buscar el formulariu pa ello. Los socios disfruten de descuentos nos productos qu’asoleyamos y nes actividaes qu’enamamos. Intentamos que tengan un papel protagonista, anque les actuales circunstancies sanitaries nun mos permiten venos tanto como nos prestaría.

Si alguien tien interés en facese sociu: https://iniciativapolasturianu.org/faite-sociu/

[RB]: ¿Crees que la repercusión que ta teniendo el tema del asturianu animará a la xente a asociase?

[IL]: Claro. Caldía más xente ta dándose cuenta de la necesidá de cuidar de lo nueso. Iniciativa pol Asturianu ta abierta a toles persones esmolecíes pola situación del asturianu y comprometíes con cambiar esta situación. 

[RB]: Dempués de munchos años parez que el tema de la oficialidá y del asturianu ta encima la mesa. Cuéntanos, dende’l to puntu de vista ¿cuál ye l’estáu del asturianu actualmente?

[IL]: Soi optimista. Nesti tiempu, diéronse munchos pasos alantre, pero la llingua sigue tando en peligru. Sigue poniéndose torgues a la matriculación n’asignatura de Llingua Asturiana, nun s’utiliza la toponimia oficial, malapenes hai programación n’asturianu na RTPA… Queda munchu trabayu por facer.

[RB]: Una pregunta polémica, ¿por qué hai asturianos que s’avergoñen o renieguen de la llingua asturiana?

[IL]: Son les consecuencies de los años de la dictadura y de cuarenta años ensin oficialidá. Durante munchos años se-y dixo a la xente que falar asturianu yera d’incultos. Ye más, na escuela franquista castigábase físicamente a quien falara n’asturianu.

[RB]: Esta pregunta tamién-y la ficimos a Inaciu l’añu pasau porque ye algo que nos toca de cerca. La redacción d’El Búscolu trabaya por cuenta ayena y ye un problema col que se encontraron d’aquelles veces… En determinaes empreses asturianes ta mal visto que los sos empleaos s’espresen n’asturianu nel so día a día. Esto ye una realidá. ¿Qué opines d’esti tema?

[IL]: Claro, y tien muncho que ver colo anterior. Sicasí, hai otros exemplos. Recién vimos cómo KFC recurría al asturianu p’anunciar l’apertura d’un nuevu restorán n’Asturies. Enantes yá lo ficieran McDonald’s, Ikea, Super Bock… Paez que cuando lo faen los de fuera vémoslo con otros güeyos. La oficialidá tien beneficios económicos. Asina lo ponen de manifestu numberosos estudios sobre l’impactu de la llingua propia na economía en territorios como’l País Vascu y la Comunidá Valenciana.

[RB]: ¿Por qué sigue esistiendo esa idea de qu’aquelles persones que falen asturianu son persones ensin formación académica o con poca cultura o son persones que viven na zona rural?

[IL]: Afortundamente ye dalgo cada vez menos habitual. La entrada del asturianu nes escueles permitió avanzar na dignificación del idioma, pero queda camín por andar. Tamién tien que ver col desprestixu en xeneral y l’abandonu de les zones rurales. La mio familia ye de pueblu y pa mi ye un arguyu.

[RB]: Iniciativa pol Asturianu defende l’usu del asturianu en toles árees. ¿Qué nos puedes cuntar sobre esto?

[IL]: L’asturianu val pa desenvolvese en cualesquier situación. Nun momentu complicáu como’l de la pandemia del coronavirus vimos que l’asturianu puede tar presente pa too: campañes anunciando les midíes de seguridá y recomendaciones n’asturianu, campaña de vacunación n’asturianu… Polo tanto podemos utilizar l’asturianu pa falar de carreteres, mediu ambienta, política social o d’economía.

[RB]: Sabemos cuál va ser la respuesta, pero queremos que nos expliques el porqué pieneses asina. L’asturianu, ¿ye una llingua o un dialectu?

[IL]: Ye un alderique que filolóxicamente nun tien nengún percorríu. El Fueru d’Avilés, de 1085, ye’l documentu más antiguu de tolos que se conserven n’Asturies y ta consideráu’l primer documentu xurídicu escritu n’asturllionés. Hai normes ortográfiques, diccionarios y una lliteratura abondosa. Una herencia cultural de la que mos que tenemos que sintir arguyosos. Esti idioma tenemos que protexelu pa que les futures xeneraciones puedan siguir falándolu.

[RB]: Parez que el tema de la llingua asturiana que en tantes llexislatures s’abordó al fin tien pinta que d’algo.

[IL]: Ye la consecuencia del trabayu constante del movimientu de reivindicación llingüística a lo llargo de toos estos años. Que’l presidente del Principáu, Adrián Barbón, use con normalidá l’asturianu pa responder íntegramente a una entruga na Xunta Xeneral nun ye dalgo casual. La oficialidá ye un mandatu constitucional que recueye l’artículu 3.2 de la Carta Magna. Agora hai una mayoría suficiente pa entamar la reforma del Estatutu y declarala. Nun s’entendería otra cosa. Nesi sen,  n’Iniciativa pol Asturianu llogramos, colectivamente, pone-y una sonrisa al movimientu de reivindicación llinüística, sumando a xente de toles opiniones polítiques y consiguiendo sumar voluntaes porque l’idioma ye de toos.

[RB]: ¿Paezte qu’un asuntu tan importante pue tratase como se ta faciendo y como se lleva faciendo toos estos años?

[IL]: Fai falta un alderique posáu. Por eso ye necesario abrir cuanto enantes el procesu de reforma del Estatutu. Hai que poner enriba la mesa munches cuestiones y sumar a toles persones posibles al consesu pola oficialidá. Queremos una oficialidá col mayor númberu posible de votos a favor y los menos en contra.

[RB]: ¿Por qué crees que los distintos dirixentes que gobernaron Asturies nun tomaron la decisión d’apoyar l’asturianu?

[IL]: Tien muncho que ver col complexu del que falábemos enantes. Los dirixentes que gobernaron Asturies toos estos años nun valoraron la riqueza cultural que supón tener un idioma propiu que tenemos que ver como una herencia cultural. Al igual que se defendió l’arte asturianu tamién tuvieron que defender l’idioma.

[RB]: ¿Crees qu’hai partíos que tán politizando la llingua?

[IL]: Llamentablemente, sí. L’asturianu y l’eonaviegu son un patrimoniu de toos y nun habríen d’utilizase pa enfrentanos.

[RB]: ¿Paezte que falar asturianu ye una cuestión de ser d’izquierdes o de dreches?

[IL]: Pa nada. N’Iniciativa pol Asturianu hai persones de tolos partíos políticos y de toles ideoloxíes. Tamos en contactu con partíos d’izquierda y derecha y la relación con toos ellos ye candial, anque tengamos puntos de vista distintos sobre lo que ye necesario pa garantizar el futuru del asturianu. L’amor pola llingua nun tien que ver col votu.

[RB]: La pasada seronda VOX llevó al Constitucional el usu del Asturianu na Xunta Xeneral del Principáu. ¿Qué opines d’esti tema?

[IL]: Tan nel so derechu. El Tribunal Constitucional foi claru recordándo-yos que toles llingües d’España, les oficiales y les que nun lo son, son un patrimonio cultural qu’ha de ser respetáu y protexíu. Ye un mandatu constitucional.

[RB]: El tema ta caliente y el PSOE puso encima la mesa que toes aquelles persones que faigan la intervención n’asturianu tendrán que repetila en castellán a continuación pa que todos los diputaos puedan enterase de la intervención.

[IL]: Ye una discriminación clarísima. La sentencia del Tribunal Constitucional diz qu’hai un mandatu constitucional qu’obliga a promover l’usu del asturianu y la Xunta Xeneral ha de ser el másimu esponente d’ello. Penalizar a quien utiliza esti idioma nel parllamentu asturianu ye una peculiar manera de promover nada. Afortunadamente, hubo una rectificación nesti sentíu y, anque nun ye la solución deseable, parez ser que ye la meyor posible.

[RB]: Fai unos díes, los diputaos del partíu verde abandonaro l’hemiciclu tras les intervenciones n’ast de Podemos. En la prensa pudieron lleése tou tipo de noticies desde mil enfoques distintos ¿Los de VOX non solicitaron la traducción? ¿Podíen facelo? ¿Marcharon enantes? ¿Podemos negose a repetir la intervención? ¿Sabríes decinos que pasó?

[IL]: Lo que tamos viendo estes selmanes na Xunta Xeneral ye un teatru. L’asturianu y el castellanu son llingues intercomprensibles. Quien diz nun entender les intervenciones n’asturianu ta utilizando esta cuestión pa politizar la llingua y dividir a la ciudadanía. Lo que ye normal na cai nun pue ser un problema nel parllamentu asturianu.

[RB]: ¿Camientes que los grupos políticos más partidarios de la oficialidá dieron o dan pasos en beneficiu del consensu y de la normalización de la llingua asturiana?

[IL]: Toos ellos son conscientes del momentu tan importante nel que tamos. Tan amosando una gran responsabilidá. Evidentemente, la pandemia ta camudando tolos planes, pero ye imporante siguir trabayando sele con seriedá.

[RB]: ¿Consideres qu’estos partíos utilicen la llingua en base a réditos políticos?

[IL]: Non, creo qu’hai un compromisu real de toos ellos. Son munchos años de trabayu y, como dicía enantes, toos son conscientes del puntu nel que nos alcontramos. El compromisu ye siguir alantre con seriedá, pasu ente pasu, ensin prises, pa nun echar por tierra’l trabayu de toos estos años. Nun creo que nengunu en particular te intentando apropiase d’esa bandera.

[RB]: L’asturianu nun necesita réditos políticos nin conlfictos. Esti idioma ye una herencia cultural de toos y de toes, de tola sociedá ensin etiquetes.

[IL]: Efectivamente. Yo siempres recuerdo una columna de Sonia Fidalgo en ‘La Voz d’Asturies’ na que falaba de l’asturianu como la llingua del cariñu. Asina ye nel mio casu. Ye la llingua que deprendí en casa de mios padres y mios güelos. Nada me fai sentir más arguyosu que contribuyir a conservala.

[RB]: ¿Dende Iniciativa pol Asturianu tenéis dalgún plan pa que la llingua dexe de ser patrimoniu de la izquierda y seya dalgo tresversal?

[IL]: Ye la base del trabayu que venimos faciendo nestos diez años d’esistencia. Somos una organización tresversal. Hai poco aconceyemos per primer vegada cola dirección del PP d’Asturies. Picamos a toles puertes.

[RB]: Si llegase a oficializase la llingua asturiana, ¿crees que podría utilizase como un arma dialéctica escluyente a la hora d’acceder a un puesto de trabayu tal y como ta sucediendo n’otres zones d’España como Cataluña?

[IL]: Nun soi partidariu de comparaciones. Si dalgo positivo tien llegar con cuarenta años de retrasu a esti procesu, ye la posibilidá de deprender de los aciertos y los errores de los demás. Tenemos de buscar un modelu d’oficialidá fechu a la midida d’Asturies. Si hai que mirar a dalguna parte, quédome con Galicia. Ye’l territoriu col que más coses compartimos, muncho más allá de lo llingüístico.

[RB]: P’acabar… ¿Por qué habría oficializase l’asturianu?

[IL]: Podríen dase munchos argumentos. La oficialidá ye la única garantía futuru pal idioma. L’asturianu ye una llingua milenaria que recibimos de los nuestros güelos y ellos de los suyos. Falar n’asturianu ye un homenaxe a toos ellos. Ye una reivindicación de lo que somos. Nun convién escaecer los nuesos raigaños, ensin qu’eso impida abrise al mundu. Amás, la oficialidá va suponer una oportunidá, un motor económicu pal nuestru territoriu, que falta nos fai.

[RB]: Ivan, muches gracies pol to tiempu. Sabemos que yes una persona que siempre anda a mil coses. Deseámoste lo meyor.

[IL]: Gracies a vosotros y a tolos llectores por sacar un ratín pa lleer esta entrevista.