Nava presenta la guía de la

Esti Martes, 18 de xunu, a les 11: 30, presentóse nel I.E.SPeñamayor de Nava la guía de la "Ruta de los Escolinos" ellaborada pol alumnáu d'asturianu del centru, cola cordinación de la so profesora Jimena García.

La Ruta de los escolinos ideóse nel añu 2017 al rodiu de los programes de salú qu'entós desarrollaba'l centru, y recuerre, partiendo del institutu los pueblos de La Polenava, H.uentesanta, Piloñeta, Grátila, Basoréu y La Cogolla, na zona conocida como La Puente Arriba, al pie de Peñamayor.

Un grupu d'alumnáu de 4ºu de la ESO (formáu por Jenifer Conde, Adrián diaz, Aroa González, Antonio Martínez, Alex Montes, Alejandro Palacio, David Pandiella y Lucía Suárez) trabayó durante'l cursu n'atropar información y materiales hasta ellaborar un folletu que guía al llector pel patrimoniu artísticu, natural y etnográficu d'esta parte del conceyu navetu.

L'ayuntamientu edita una tirada de 500 exemplares, que se podrán consiguir na oficina de turismu y la casa conceyu, y tamién podrá descargase'l pdf de la páxina web del ayuntamientu, col fin de visibilizar esti guapu proyectu y poner en valor la 'Ruta de los escolinos', tanto dientro del conceyu como fuera d'él.

Semeyes: Alumnáu participante / Alumnáu participante con Luis Gutiérrez (director del centru), Jimena García (profesora d'asturianu), Jairo Palacios (conceyal) y Pablo Suárez (del serviciu de normalización llingüística)