Alcordances - IV Concurso de Relatos Navideños El Búscolu

Alcordances - IV Concurso de Relatos Navideños El Búscolu

Publicada por Redacción Búscolu el 07/12/2015 22:24:10

Relato participante en esta edición del concurso

Alcordanza cuando yera pequenu, la ilusión d'una nueva Navidá,
la escursión al monte a buscar mofu, corchu, galzeran,
un pocu de romeru y tomillu, piñes seques y piedres.
Tamién cortábamos un enebro p'afatalo como un abetu,
y volvíamos a casa cuando yá yera escuru cola ñariz colorada del fríu.

Dempués a desembalar les figures, nengunu del mesmu tamañu,
había un coneyu más grande que'l neñu Jesús y un espeyu que faía d'estanque,
un cascu de nuevu yera un depósitu pol granu, una cabra paecía un caballu,
una abiyota partida pola metá yera un aguarón con unos bigotes de metal.

Pinchábamos afatando l'árbol y siempres se nos rompía daqué,
la casa golía a monte, de pinu y ocalitu, de tierra y mofu.
Les boles llucíen reflexando les nueses cares de neños con ñariz de pataca,
los nuesos deos dexaben imprentes sobre'l doráu y la plata.

Mirábamos el Neñu na so cama de paya, la nieve de farina El Gallu,
el pastores coles sos ufriendes, y los Reis colos sos paxes.
Un añu más la maxa taba en casa, na cai y perdayuri.
Una vegada más nacia el Neñu dende la escuridá de les bufardes.

Cómo pasaron los años... Diez, venti, trenta... y más.
Agora ye prohibíu coyer mofu y cortar árboles del monte,
hai figures y boles de plásticu y variedá d'adornos,
xuguetes de toes clases  a los grandes almacenes.
Aprendimos qu'allá onde dicen nació Dios ye'l desiertu,
non  nieva, el sangre arrámase y de paz nun tienen nada.

Y pos, ¿acabóse la ilusión  d'aquellos vieyos tiempos?
¿Yá nun va venir la maxa a visitar los nuesos llares?

Les coses son más difíciles, más esmoliciones, munchos males de xefes,
problemes, trabayu ya infinidá de responsabilidaes.
Pero nun vos esmolezáis, la maxa va tar na vuesa casa.
Nun va venir de fora, nun la traen estes fiestes.

Toos aquellos sentimientos d'entós son dientro del nuesu,
y namá fai falta un motivu y que dexamos volar un golpe más la imaxinación.
Montáis el preselbe, miráis les figures vives dientro de la folla.
Quién movió los reis? Quién fixo cayer el caganer?
Ta mirándome la muyer que llava al llau del payar?

Alegrémonos un golpe más pa tar toos xuntos,
polos que tán  físicamente, y polos que yá namá viven en nuesu pensamientu.

Volvemos ser neños, suspendamos temporalmente la nuesa incredulidá.
Les cabres pueden paecer caballos! Un espeyu puede ser fondu como un llagu!
Mirémonos los unos a los otros, con güeyos nuevamente brillosos,
deseyándonos un añu más, como si fuera'l primeru, FELIZ NAVIDÁ!


¿Quiéres comentar? Identifícate o Registrate

También en El Búscolu