Manifiestu Música n asturianu SÍ. En respuesta del sector musical a la vulneración de derechos

BEl manifiestu denuncia la «vulneración de derechos gravísima», esixe «responsabilidaes polítiques» y que «de nenguna manera esta intención declarada llegue a facese realidá».

 Pa ello, la iniciativa busca apoyos individuales y colectivos del sector musical que se pueden facer rellenando esti formulario (https://forms.gle/ie5FbSNkUkp7eUu36) hasta'l domingu 2 de xunetu; el planteamientu ye facer públicos los sofitos la selmana del 3 de xunetu.

Ante les intenciones de VOX de nun programar música n’asturianu nos eventos festivos de Xixón, manifestamos lo siguiente:
Plantegar el vetu a artistes según la llingua qu'usen ye una vulneración de derechos gravísima que nun se pue tolerar nuna sociedá democrática. Supón un ataque non namás pa contra la música n'asturianu; sinón tamién pa contra tol sector musical -al marxe de la llingua qu'empleguen-, contra la creación cultural n'asturianu, contra les y los falantes d'esta llingua y contra los valores democráticos d'una sociedá del sieglu XXI.
Les persones que se dediquen profesionalmente a facer música n’asturianu son trabayadores d’Asturies. Paguen los sos impuestos, les sos cotizaciones a la Seguridá Social y apuesten por vivir n’Asturies del so trabayu, bregando contra la inestabilidá y la precariedá llaboral. Estes y estos trabayadores han tener los mesmos derechos que cualquier otru sector profesional y nun deben ser discriminaos de nenguna manera poles alministraciones públiques.

Hai munches persones que tamién faen música n’asturianu desinteresadamente a traviés d’entidaes ensin ánimu de llucru. Les agrupaciones corales, los grupos de baille tradicional o les bandes de gaites faen un trabayu importantísimu por caltener vivu el patrimoniu inmaterial asturianu y asegurar el futuru de la nuestra cultura gracies a espardelu ente les xeneraciones más nueves.

Toa esta actividá musical profesional y desinteresada revierte n’otros sectores de la economía asturiana. Tiendes d’instrumentos musicales, luthiers, sector textil artesanal; profesionales del soníu, lluces y producción; diseñadores gráficos; hostelería o turismu, son dalgunos de los sectores que, en mayor o menor midida, vénse favorecíos pola actividá de la música n’asturianu.

Les actividaes festives nes qu’hai presencia de música n’asturianu na ciudá son mui diverses, pa tolos públicos y tán mui enraigonaes na ciudá. Eventos tan populares como baillar la Danza Prima nel Restallón, los Cancios de Chigre de la Plaza Mayor, los Concursos de Canción Asturiana o’l Día de la Reciella son dalgunos exemplos. Amás, l’asturianu suena, con éxitu de públicu, n’actuaciones musicales que van dende les de les agrupaciones corales y folclóriques hasta artistes de músiques actuales.

La música n’asturianu ye marca Asturies y tamién marca Xixón. Nesta villa nacieron y/o vivieron artistes tan importantes pa la música asturiana a lo llargo de distintes époques como Obdulia Álvarez "La Busdonga", José Ángel “El Presi”, Carlos Rubiera, Felpeyu o Nacho Vegas. Toos ellos cantaron y canten n’asturianu y ente ellos actuaron pelos 5 continentes, enseñando al mundu lo que ye Asturies y la nuestra cultura; porque la música n’asturianu tien el mesmu potencial que’l flamencu n’Andalucía, el fado en Portugal o’l blues n’Estaos Xuníos, anque nel nuestru casu esto ta ensin esplotar y amás agora quier prohibise de los espacios públicos.

Sentimos arguyu por Asturies, pola cultura asturiana y pola llingua asturiana. Un arguyu que nos lleva a defender tolo que tenga que ver con ella y tolos puestos de trabayu xeneraos alredor d’ella. Sería impensable que nos eventos festivos de Valladolid nun programaren música en castellano, en Ferrol en gallego, en Badalona catalán o en Pamplona en euskera. Toes estes ciudaes tán gobernaes por partíos políticos conservadores y nun se-yos ocurrió rechazar la programación cultural fecha en dalguna de les llingües d'esos territorios. ¿Por qué en Xixón sí? ¿Por qué nes fiestes d’equí pue sentise inglés, italianu o húngaru y non asturianu? ¿Por qué les y los trabayadores culturales asturianos nun tienen derechu a trabayar na so tierra? ¿Por qué mancar d’esta manera a la nuestra cultura y a la nuestra economía? Queremos dicir al altu la lleva que yá valió de faltar al respetu a la cultura asturiana, de crear problemes onde nun los hai y que nun pueden quedar impunes dicir y querer facer estes barbaridaes.

Por too esto exisimos responsabilidaes polítiques pa con quien quiera prohibir la música n’asturianu nos eventos festivos de Xixón y que de nenguna manera esta intención declarada llegue a facese realidá.

Asoleyamos esti manifiestu pa reflexar el nuestru sentir y algamar apoyos? individuales y colectivos per parte del sector musical. Amás manifestamos el nuestru sofitu a otres iniciatives más amplies que puedan surdir pa dar respuesta a cualesquier vulneración derechos fundamentales.