Mercáu Social Nava: Propuestes d’inclusión y aportaciones al anteproyectu de llei de calidá agroalimentaria.

Publicada por Redacción Búscolu el 01/07/2017 18:54:35

A LA CONSEYERÍA DE DESARROLLU RURAL Y RECURSOS NATURALES. (Nome y Apellíos) (colectivu) presento: Propuestes d’inclusión y aportaciones al anteproyectu de llei de calidá agroalimentaria. Nes places y mercaos d'Asturies atopamos, sobre too na zona rural, perfiles diferentes de persones que venden nellos.

Hai profesionales daes d'alta na actividá agraria, xente que ta entamándola y tovía nun xenera ingresos suficientes como tal, persones que venden escedentes de la güerta casa de forma fixa o puntual, y revendedores de productos compraos a mayoristes.

Ente los puestos podemos ver fruta y verdura fresca, plantón, güevos, quesos, mantega, miel, sidra, dulce, conserves… Cola Llei de Calidá Alimentaria va regulase, ente otres coses, la venta directa nestos espacios y d'estos productos.

La nuestra intención, con estes alegaciones, ye que la normativa recueya les realidaes diferentes de les campesines y vendedores. Pa ello pidimos qu'éstes, xunto cola sociedá civil y les consumidores, formemos parte activa de los órganos de participación que s'articulen a partir d'esta llei. En primer llugar, gustaríanos qu'esta norma se redactara nun llinguaxe comprensible, que tenga en cuenta aspectos de xéneru y que parta d'un paradigma de sostenibilidá, trabayu dignu y xusticia social, más que de competitividá empresarial.

Nesti sentíu, creemos que l'Alministración debe plantease'l so papel na relación colos distintos actores y adoptar el compromisu d'ayudar a texer redes, crear puentes, ofrecer formación, seguimientu, asesoramientu y apoyu; evitando caer nun modelu sancionador y promoviendo l'autocontrol y les buenes práctiques nel sector. Por otra parte, queremos constatar que la venta directa y les canales curties de comercialización (CCC) suponen un aporte económicu importante na sociedá de la zona rural.

Flexibilizar la norma, pa facilitar que les esplotaciones pequeñes destinen una parte de la so producción a elaborar conserves y transformaos, ye ún de los oxetivos prioritarios d'estes alegaciones. Y pa qu'esto sía efectivu, debe tenese en cuenta'l tamañu de les esplotaciones y el volume de negociu de les mismes, ente otros factores. Por ello, xunto a estes alegaciones presentamos un decálogu con recomendaciones y propuestes a tener en cuenta de cara a la redacción y implementación d'esta normativa.

Les principales alegaciones y aportaciones, por tanto, van destinaes a flexibilizar y posibilitar la venta directa y les canales curties de comercialización.

Asinamesmo, fáense otres aportaciones siguiendo’l mesmu orde del anteproyectu de llei ya indicando los artículos y apartaos: 1. APORTACIONES AL TíTULO I. DISPOSICIONES XENERALES Modificación de los puntos a) y h) del Artículu 2. Fines: a) Suprimir el términu “la competitividá” y sustituilu por “sostenibilidá”. h) Asegurar la participación d'axentes sociales y económicos y de la sociedá civil, faciendo referencia esplícita de quién son esos axentes (sindicatos, asociaciones, plataformes, colectivos vecinales y de campesines, grupos de consumu y entidaes o xuntances similares)

Estos puntos pasaríen a tar redactaos como siguen (en cursiva el testu modificáu): “a) Fortalecer, promover y meyorar la sostenibilidá del sector alimentariu asturianu. h) Asegurar la participación de los axentes sociales, económicos y de la sociedá civil incluyendo sindicatos, cooperatives, asociaciones, plataformes o colectivos vecinales y de campesines, grupos de consumu y entidaes o agrupaciones similares, nel diseñu y na aplicación de la política alimentaria y potenciar los instrumentos d’interlocución y concertación qu’aseguren l’adecuación de les actuaciones de l’alministración a les necesidaes del sector alimentariu”. Art. 3. Definiciones xenerales a) Que quede incluíu'l plantón de plantes hortícoles, árboles y frutos pequeño (agora mesmu señala que queden escluíes “les plantes antes de la collecha”, habría que quitar eso) j) Que l'ámbitu xeográficu cercanu incluya comunidaes vecines. Modificación del puntu m) del artículu 3, pa que s’incluyan tamién asociaciones, plataformes o cualesquier otra forma de xuntanza de campesines, independientemente de la esistencia de dalgún tipu de forma xurídica y de la so composición. Incluir nel puntu 2 del artículu 4 relativu al conseyu asesor, a otros grupos y persones de la sociedá civil, como les campesines, grupos de consumu, vecines de la zona rural, etc. 2.

APORTACIONES AL TÍTULU II. CALIDÁ ALIMENTARIA CAPÍTULU II. CALIDÁ DIFERENCIADA Incluir na Sección 5ª, relativa a Marques de Garantía, la creación d'un sellu, distintivu o indicador de venta de producción local o de proximidá nos comercios minoristes, mercaos locales, etc qu’acrediten qu’ellí véndensen productos de proximidá y sostenibles, como forma d’incentivar les canales curties de comercialización, la economía local y el consumu responsable.

CAPÍTULU III. FOMENTU Y ORGANIZACIÓN DE LA CALIDÁ ALIMENTARIA Incluir nel artículu 19, sobre desarrollu tecnolóxicu y innovación alimentaria, un puntu onde se declare a Asturies como un territoriu llibre de tresxénicos, así como, medíes de control pa evitar qu’esto pase nos apartaos correspondientes relativos a Inspección y Sanciones de la Llei. Incluir nel artículu 20, relativu a la promoción de los productos alimentarios, el fomentu y desarrollu de la producción de variedaes y semientes locales y adaptaes. Asina l’apartáu d) quedaría redactáu como vien darréu: d) Promocionar los modelos de producción propios de la Comunidá Autónoma, los mercaos internos, la producción local, les canales curties de comercialización, les variedaes de semiente local y la producción ecolóxica. Nel apartáu e) proponemos la inclusión de dalgo relativu a la temporalidá de la producción, tener en cuenta’l productu de temporada y fomentar el so consumu, quedando redactáu como vien darréu: e) Difundir y informar sobre la calidá de los productos alimentarios impulsando tamién el conocimientu y consumu de los productos de temporada, destacando los aspectos históricos, tradicionales, culturales, la so vinculación al territoriu, les innovaciones y les elaboraciones nueves. Modificación del artículu 21, relativu a la promoción del cooperativismu, pa incluir tamién non namás a les cooperatives sinon tamién, a les unidaes familiares y asociaciones.

CAPÍTULU IV. ARTESANÍA ALIMENTARIA Añadir o adicionar nos artículos 23 y 24, un apartáu, nel que se contemple que na redacción del reglamentu, l'órganu competente, mediante un procesu participativu, tendrá en cuenta y consensuará dicha reglamentación colos axentes sociales, campesines, etc.

3. APORTACIONES AL TÍTULU III. ENTIDAES DE XESTIÓN DE LES DENOMINACIONES. Incluir nel artículu 25, relativu a la naturaleza y constitución de les entidaes de xestión, que los entes y organismos de xestión recoyíos sían de naturaleza totalmente pública. Incluir nel artículu 27, relativu a les funciones de les entidaes de xestión: "Fomentar les relaciones de confianza ente les campesines y les consumidores nes canales curties de comercialización.”

4. APORTACIONES AL TÍTULU V. VENTA DIRECTA D'ARTÍCULOS ALIMENTARIOS Consideramos que ye importante asegurar la posibilidá de venta sin rexistru sanitariu pa les pequeñes agroindustries o campesines, na venta directa y nes canales curties de comercialización (que son más amplies y inclúin poques intermediaries). Nesti Títulu, habría qu'incluir canales curties de comercialización en tolos momentos nos que se fala de venta directa. Tamién tendría qu'esistir un compromisu por parte de les instituciones de fomentar estes Canales Curties de Comercialización (CCC). Debe quedar constancia de que les canales curties de comercialización son pa pequeños volúmenes de negociu, polo qu’empreses de supermercaos asturianes nun pueden presentase como un CCC. Modificación del artículu 37, relativu a la venta directa, entendemos qu’amás de la venta directa (directamente a la persona consumidora final), la normativa debe tamién contemplar les modalidaes de les canales curties de comercialización (con una intermediaria local o de proximidá).

Asina, la normativa debería contemplar tamién a les tresformadores pequeñes de productos primarios de terceros productores que depués vende o venden conxuntamente directamente a la consumidora final nel ámbitu de les CCC. Esti procesu de tresformación puede desenvolvese por un productor, o una agrupación de productores, tanto nes instalaciones propies como d'usu compartíu, coles sos producciones propies como ingrediente principal. Ye asina qu'entendemos que la normativa ha d'incluir tamién, amás de la venta directa a la consumidora final de productos de producción y elaboración o tresformación propia, la venta directa de la producción primaria en circuitu curtiu de comercialización (con una intermediaria como másimu), por poner el casu, la venta na finca propia, en tiendes d’otres campesines; venta a comedores de toa clas: sociales, d’empreses, hospitales, escueles y similares; mercaos; tiendes minoristes; venta en restauración; grupos de consumu; venta a domiciliu o plafaformes online.

Propónse la redacción que vien darréu, sin ánimu de facer una llista detallada de posibles minoristes yá que nun queremos torgar les canales de comercialización.

1. Entiéndese por venta directa la venta de pequeñes cantidaes de productos alimentarios de producción primaria o d'elaboración propia, realizada por una o delles campesines, directamente a la consumidora final, o en canales curties de comercialización, con un másimu d'una intermediaria, a otres campesines, establecimientos minoristes, incluyendo la restauración colectiva, comedores sociales, d'empreses, escueles, hospitales y instituciones, restaurantes y instalaciones de turismu rural, o cualesquier otra clas de comerciu minorista o entidaes asemeyaes.

2. La venta directa podrá realizase na finca o instalación de la campesina, grupos de consumu, mercaos, feries, tiendes o establecimientos minoristes, venta a domiciliu o al traviés de tecnoloxíes de la comunicación. Modificación del apartáu 2, del artículu 39, no que cinca a los Productos oxetu de la venta directa: 2. Tolos productos oxetu de venta directa deben cumplir les condiciones específiques establecíes nes Guíes de buenes práctiques. Estes guíes han ser definíes ente campesines, personal técnicu cualificáu de les instituciones públiques y consumidores de forma consensuada. Nelles ha establecese una diferiencia de criterios de cara a la flexibilización de la normativa sanitaria pa facilitar la elaboración de productos tresformaos nes esplotaciones pequeñes.

Aportaciones al artículu 40, no que cinca a los Requisitos y obligaciones de la venta directa.

Entendemos qu'estos requisitos y obligaciones son namás de cara a les campesines y nun se planteen esixencies a l'alministración. Nesti sentíu, creemos que debería esistir un compromisu por parte de la mesma pa: - Simplificar y flexibilizar la burocracia (disminuir el númberu de formularios y trámites diferentes pal COPAE, el control de fitosanitarios, el rexistru de venta directa…) Establecer un control de trazabilidá únicu pa les distintes instituciones. - Facilitar formación y ferramientes a les campesines pa llevar a cabu'l seguimientu, rexistru y control de los productos. - Destinar fondos públicos pa: Fomentar el consumu del productu local en forma de campañes publicitaries, presencia tresversal nos planes educativos, espaciu nos medios públicos de comunicación, etc; Promover la claridá, tresparencia y acercamientu ente campesines y consumidores pa fomentar les relaciones de confianza. - Medíes de flexibilización de la lexislación de calidá agroalimentaria p'apoyar les canales curties de comercialización y pa productores pequeñes. Debería ser abondo'l cumplimientu de les Guíes de buenes práctiques, que tendríen que ser elaboraes ente campesines, instituciones y consumidores. - Formación de les campesines pal autocontrol en actividaes d'elaboración o tresformación, asina como un acompañamientu y asesoramientu tresversal por parte de l'alministración.

5. APORTACIONES AL TÍTULU VI. INSPECCIÓN Y RÉXIME SANCIONADOR Que les sanciones, nel casu de ser pertinente, cuando sían de carácter leve, sían cubiertes pola formación y non namás al traviés d'elementos coercitivos como multes o inhabilitaciones. 6. Aportaciones a la Disposición adicional tercera. Representación profesional agraria: Establecer representación pa los distintos sectores (agrícola-ganaderu) y pa les formes distintes de producción (ecolóxicu-convencional). A la busca d'una representación más plural, consideraránse organizaciones agraries más representatives nel ámbitu d'Asturies, les qu'algamen, como pocu, un 5 por cientu del total de los votos válidos emitíos en tola Comunidá Autónoma. Incluir un apartáu de Representatividá de la sociedá civil del mediu rural. Entendemos que, na realidá Asturiana, hai un gran númberu de persones que se dediquen a la producción primaria de manera non profesional y que saquen la so producción al traviés de la venta directa d'escedentes agroalimentarios en mercaos y places y al traviés de les CCC.

Paeznos qu'esta llei recueye la representación de los agricultores profesionales, pero non d'esti colectivu, qu'en munchos casos utiliza la venta directa como mediu pa complementar pequeñes economíes familiares (polo xeneral, precaries enforma) basaes na vida nel mediu rural. Sería xusto que l'Alministración reconociere'l papel d'esti colectivu como principal conservador de la vida, el paisaxe, la cultura, les costumes y la sostenibilidá del entornu rural asturianu, cola so participación y presencia activa nos distintos organismos institucionales y instrumentos d'interlocución que s'articulen a partir de esta Llei, al traviés de la presencia d'asociaciones de vendedores, asociaciones de vecines de la zona rural, grupos de campesines, etc. Polo espuestu, en tiempu y forma oportunes, presentamos estes alegaciones y aportaciones al anteproyectu de llei de calidá alimentaria, solicitando la so estimación, col oxetivu de que se recueyan y se tenga en cuenta la realidá del campesináu y vendedores locales, sobremanera no que respecta a la venta directa y les canales curties de comercialización, flexibilizando la norma lo másimu posible, pa facilitar que les esplotaciones pequeñes puedan vender los sos productos, conserves y tresformaos, nos mercaos y circuitos cortos de proximidá.

En Siero, a 30 de xunu del 2017. Firmáu: ...

¿Quiéres comentar? Identifícate o Registrate

También en El Búscolu