La iniciativa ciudadana pa entamar una agrupación d'electores de xunidá popular ye una iniciativa
ilusionante y que recueye l'espíritu xunitariu y participativu al que nós afalamos.

Les persones que dende l'ámbitu nacionaliegu y/o soberanista d'izquierdes venimos desendolcando la
nuesa xera sociopolítica en Ribeseya y que nestos caberos años trabayemos nel conceyu de Ribeseya
p'afitar Conceyu Abiertu, queremos asoleyar púlicamente la nuesa alegría pol nacimientu de la iniciativa
popular Pueblu de cara a les vinientes eleiciones de conceyu de 2015.

Dende la izquierda soberanista atalantamos que Pueblu ye un espaciu afayaízu onde cualesquier
soberanista va poder siguir desendolcando en Ribeseya polítiques movilizadores y d'empoderamientu
popular, con unos plantegamientos que recueyen la esencia que motivó'l nacimientu de la nuesa
organización y que permítennos sentinos cómodes. Además, préstanos enforma la idega de participar
llibremente xuntu a persones qu'hasta agora o bien sofitaben otres opciones polítiques o preferíen nun
facelo a nenguna en concret, ente un escenariu de división y onde nun esistíen mecanismos materiales que
permitieran la so participacion n'igualdá, lo que nos paez que tien reflexu nun clima d'ilusión nel conceyu
qu'anticipa que tamos énte un momentu hestóricu pa Ribeseya.

Poro, anunciamos que la militancia y simpatizantes de Conceyu Abiertu nel conceyu de Ribeseya apostamos pola participación nos vinientes conceyos abiertos qu'entamen dende Pueblu y comprometémonos asina mesmo a potenciar y enanchar en tolo que podamos esta iniciativa que más allá
de la unidá de la izquierda, significa la contruición d'una ferramienta d'auténtica xunidá popular, llamada
a cambiar pa siempre la vida nel conceyu de Ribeseya. Nun nos queda nenguna duda de que tamos énte
la oportunidá d'encadarmar una mayoría que va faer por primer vegada la política va dirixila la mayoría
de vecinos y vecines del nuesu conceyu, faciendo asina realidá la másima de que solu'l pueblu salva al
Pueblu.