Conceyu Abiertu ye un movimientu políticu de calter conceyil, nacíu a entamos del añu 2011 con unos finxos determinaos y esplicitaos nel so manifiestu fundacional, que xiren al rodiu d'unos principios de calter xeneral bien afitaos.

Somos un movimientu plural afitáu n'Asturies, que nagua pola movilización como mediu p’algamar la tresformación social, llegando a estremaos seutores de la sociedá qu'hasta esti momentu nun tuvieron compartiendo espaciu políticu cola esquierda nacionaliega, y que más allá de coincidencies puntuales o coxunturales, sía quien a amestar dientro d'una mesma corriente de trabayu a tolos sectores que tengan en común los valores de la esquierda tresformadora.

Entendemos que solu dende la xunidá popular puen defendese eficazmente los intereses de les clases sociales primíes equí n'Asturies y en cualesquier llugar, amestando tamién a esti movimientu les lluches feminista y ambiental, faciendo too ello dende un marcu asturianu de calter soberanista y qu'apueste ensin complexos pola normalización social de la cultura asturiano que faiga de contrapuntu a l'aculturización y el desaniciu capitalista.

Aspiramos a algamalo dende un movimientu conceyil, nel ampliu sentíu del términu, radicalmente democráticu y qu'algame una alta participacion popular como mecanismu d'educación política revolucionaria. Naguamos por un movimientu que mos permita construyir una rede de conceyos qu'aporte a tol ámbitu nacional y qu'atalante a estos como organización xeográfica y institucional más averada a la xente, defendiendo la figura del conceyu abiertu como ferramienta ancestral de participación de les persones, propia de la nuesa cultura y que tovía ta presente na realidá y na memoria colectivo del pueblu asturiano y que polo tanto, pue incorporase dafechu a la práctica política institucional diaria de los nuesos pueblos y barrios.

Nesi sen venimos trabayando estos años, tendiendo pontes ente estremaes sensibilidaes polítiques y tratando de facer camín al andar. Poro, dende l'entamu, plantegamos la fecha d'estes eleiciones europees como un eventu a tener en cuenta pa siguir trabayando na Xunidá d´Aición, n'especial ente les organizaciones polítiques asturianes d'ámbitu soberanista, dau'l trabayu que se foi desendolcando primordialmente a lo llargu del añu 2013 con delles movilizaciones feches a comuña, como'l Primeru de Mayu, el 25 de Mayu o'l Día de la Nación Asturiana y que permitió albidrar la fin de l'atomización de les organizaciones de la Esquierda Soberanista.

Les esperiencies d'anteriores eleiciones nun traxeron un espoxigue del nivel de concencia soberanista nel pueblu asturianu, y non solo como consecuencia del so desapegu haza estes cites eleutorales y les instituciones a les que dan accesu.

Güeyamos cómo, vegada tres vegada, les eleiciones europees superen siempres ampliamente'l 50% d'abstención nel nuesu país, espeyando con ello que la mayor receutividá en tiempos d'eleiciones europees podría tar n'otres víes d'aición non puramente eleutorales que seyan quien a superar les rocees que xeneren les propuestes feches d'espaldes a la sociedá y asoleyaes pocu enantes de la campaña eleutotal.

A too ello hai qu'amestar una situación social, económica y política decadente dafechu: pieslle constante d'empreses, paru, emigración, corrupción de los grandes aparatos partidistes (PSOE, PP, IU...) y sindicales (UGT, CCOO), inoperancia gubernamental, desaniciu de los seutores económicos del país, etc. conformando too ello una situación d'emerxencia social que requier del encadarmamientu d'alternatives sólides que dean rempuesta a los problemas d'Asturies dende'l nuesu marcu específicu conceyil, asturianu y de la esquierda tresformadora, fuxendo de dinámiques sucursalistes claramente inoperatives pa confrontar los problemes del pueblu asturiano.

Poro, la utilidá principal d'estes eleiciones yera primordial y prioritariamente l'afondar na dinámica xunitaria del nuesu movimientu, imprescindible na llucha por una Asturies asitiao nun contestu soberanu y popular. En viendo la situación sociopolitica de l'Asturies d'anguaño, ye imprescindible entamar construyendo'l soberanismu dende bases sólides, algamando una necesaria xunidá qu'apurra la enerxía entamaor colo qu'algamar una fuercia teórica y organizativa pa ser quien a desarrollar y aplicar una estratexa y táutica consensuada y adautada al contestu concretu de la nuesa sociedá.

Nesti sen, apostemos firmemente pol alderique ente toles organizaciones coles que compartimos espaciu, con un oxetivu claru: dir toes a una y puxar pola mesma estratexa de cara a esti eventu. Asina, dende Conceyu Abiertu, dempués d'un primer Conceyu Nacional monotemáticu, atalantamos que les úniques dos formes posibles d'afondar nesi camín y enfocar a comuña les eleiciones al Parllamentu Européu nesti momento yeren:

1- Promover una campaña xunitaria soberanista y anticapitalista, remembrando a la sociedá asturiano lo que significa'l Reinu d'España como pata de la Xunión Europea (n'alantre X.E.) qu'amarra dientro d'ella a Asturies, baxo los mandaos de la Troika y tolos demás amos de la Europa del Capital. Tendría de ser esta una campaña que con esos finxos y, xugando cola coincidencia de feches col 25 de Mayu, punxera l'acentu nuna realidá asturiana, que, d'otra forma, entendíase que diba quedar dafechu tapecía. Asina, al traviés de conceyos abiertos pel país, pretendíase entamar una campaña xunitaria, cola propuesta d'ellaborar unes papeletes temátiques y ensin firma, qu'entendíemos podíen llegar a xunir a organizaciones polítiques, sindicales, sociales hasta agora desmovilizaes nos procesos eleutorales, algamando frutos especialmente como esperiencia movilizadora xunitaria y que podría midir la fuercia social d'una opción d'esti calter non solo al traviés del votu nulu algamáu y cuantificable en númberos, sinón cola capacidá d'incidencia social algamada.

2- Presentándose a les eleiciones con una candidatura xunitaria asturiana qu'incluyera a los mesmos seutores de los que se fala na primer opción y col mesmu calter abiertu y participativu y que participare como estaya asturiana dientro de la coalición encabezada y promovía pola organización soberanista vasca EHBildu, al traviés de los contactos qu'Andecha Astur bien calteniendo cola mesma a lo llargo de 2013 y 2014 col finxu d'amestase a la mesma.

Dempués de caltener numberosos contactos con estes organizaciones coles que venimos compartiendo espaciu políticu y, viendo que col trescursu de les feches nenguna apostaba por nengún d'estos posicionamientos y decidíen escoyer otros caminos y otres estratexes polítiques, nesti Conceyu Nacional cellebráu'l 15 de marzu de 2014, a Conceyu Abiertu nun mos queda otru camín que decidir nun participar activamente de les vinientes eleiciones Europees. Creyemos que cualesquier otra forma d'afrontar esti eventu nun sería productivu nin pal proyectu que Conceyu Abiertu representa, nin pa siguir afitando la cadarma d'un proyectu políticu soberanista xunitariu p'Asturies.

Respeuto a la escoyeta de les organizaciones de la Esquierda Soberanista a les que nos referimos hasta agora, atalantamos que:

1) La tradicional participación en candidatures eleutorales internacionales respuende a una dinámica na que los procesos eleutorales vienen siendo vía preferente dende la que desendolcar el trabayu políticu, siendo especialmente evidente esto dada l'actual debilidá del nuesu movimientu, imposibilitando asina un desendolcu del mesmu y la xeneración d'una visión braeramente tresformadora y internacionalista. Atalantamos qu'apostar por esa opción ye contraria a los finxos d'actuación política de Conceyu Abiertu y que nun tendría en cuenta la realidá social nin la diferencia na correllación de fuercies ente les organizaciones de los distintos países que componen estes candidatures. Amás, enantes de facer un simple amiestu sigles nuna candidatura, sía esta llocal o d'ámbitu europeu, vemos necesario tener enantes iguáu y coordináu un discursu propiu y soberanista asturianu y que la concurrencia a unes eleiciones seya asina'l reflexu d'una trayectoria de trabayu y alderique previos, dende la que dir afitando, pasu ente pasu, un proyectu políticu y social abiertu y ampliu, dinámicu y con unos pegoyos sólidos. Un proyectu qu'aspire necesariamente a lo más alto y non conformase simplemente con esistir como alternativa electoral, o que saque dalgunos votos más qu'otres candidatures asemeyaes.

2) Que l'apueste d'otros seutores colos que tamién compartimos espaciu políticu, por nueves propuestes polítiques que nacen dende arriba y de calter español y eleutoralista, contradicen d'igual forma'l plantegamientu de Conceyu Abiertu en cuantes a la necesidá de construyir la xunidá d'aición popular al traviés d'un proyeutu dende abaxo y con un marcu específicu asturianu. A pesar del trabayu dende lo llocal pol que paez apostar anguaño, camentamos que nun ye esa pel momentu una ferramienta que permita'l nuesu desendolcu como alternativa no teórico y práutico, ya que nun cunten coles clases populares como protagonises de la tresformación sinon como correa de tresmisión al serviciu d'una minoría d'intelectuales o élite del movimientu de quien depende too nesti momentu. Atalantamos amás que non solo nun tien en cuenta la realidá social y plurinacional del Reinu d'España sinón que delles vegaes averase peligrosamente a un discursu y practiques elitistes y centralistes.

Paeznos que la nuesa postura naz d'un analís non eleutoral de la coxuntura xeneral na que s'atopa Asturies; la mera observación de la repercusión pernegativa que vienen teniendo durante décades nel nuesu país les polítiques comunitaries espeyen perbien que nin siquier ye una institución na que faiga falta tar padesenmascarala dende dientro, nin muncho menos pa reformala, puesto qu'atalantamos que ye una estructura desllexitimada dafechu na so esencia y nel día a día.

Esta desllexitimación entama cola propia X.E. dende'l so nacimientu como alcuerdu de llibre comerciu ente dellos estaos, que fae qu'esta nun seya más qu'una ferramienta económica estatal al serviciu de les élites. Élites, que nel so porgüeyu nun dubien en desaniciar les sociedaes y la economía de los pueblos de la XE y países de forma que naciones como Asturies, queden condergaes a un futuru escuru, ensin alternativa pal pueblu trabayador. Asina los seutores económicos tradicionales como la pesca, l'agricultura, la minería o la siderurxa, la naval o la enerxía dan bona cuenta d'esta cuestión, lo mesmo que toles demás alternatives económiques y d'empleu nes que quisieron facenos creer pero que nun son viables si atendemos a la fola de retayos en drechos sociales, llaborales y llibertaes. Les grandes privatizaciones entamaron tamién cola X.E. nos años 90, y siguen les que carecemos anguañu cola totalidá de servicios públicos, munchos d'ellos d'ámbitu marcadamente llocal. A too esto hai qu'amestar un muérganu de representación y aición política de la X.E. como'l propiu Parllamentu Europeu, al que si bien se-y cedió dalgunes competencies nos caberos años, tien una capacidá d'aición enforma llimitada y que ta subordináu dafechu a otros muérganos institucionales como'l Conseyu Europeu o los poderes económicos non democráticos al traviés d'entes como'l BCE, el FMI o los grandes capitales tresnacionales.

Dende Conceyu Abiertu queremos amosar el nuesu enfotu nos finxos colos qu'esti movimientu nació y que venimos desendolcando nesti tiempu, enfotámonos nesi trabayu. Sorrayamos la necesidá de siguir afitando proyectos de participación y lliberación popular dende les bases, participando y entamando tou tipu de plataformes, organizaciones, colectivos o asamblees que sigan contribuyendo a la creación d'una rede soberanista popular, imprescindible p'afitar los pegoyos d'un proyectu políticu emancipador pa les persones primíes n'Asturies.

Por too ello, tres toos estos aconceyamientos y alderiques, dempués d'esti analís que compartimos y viendo que nun hebo entendimientu ente les organizaciones del ámbitu soberanista asturianu pa construyir l'alternativa que defendemos, decidimos nun participar del procesu electoral d'escoyeta de representantes pal Parllamentu Europeu del viniente día 25 de mayu de 2014.

Uviéu, 15 de marzu de 2014