???????

La Conseyería de Cultura, Política Llingüística y Turismu punxo en marcha un grupu de trabayu pa tratar la problemática que causa l’usu, cada vez más frecuente, de detectores de metal sobre’l patrimoniu arqueolóxicu. Tres de detectar una medría relevante de los casos de particulares qu’usen esta clas de ferramientes pa rastrexar restos ensin tomar precauciones qu’eviten daños en xacimientos con valor arqueolóxicu, la Dirección Xeneral de Patrimoniu constituyó una comisión pa tentar d’atayar posibles perxuicios.

El director xeneral de Cultura y Patrimoniu, Pablo León, presidió güei la primer reunión del grupu de trabayu, del que formen parte’l xefe del Serviciu de Patrimoniu Cultural, la directora del Muséu Arqueolóxicu d’Asturies, dos arqueólogos d’esti equipamientu cultural, una historiadora del serviciu de Patrimoniu Cultural, un representante de la Guardia Civil, otru de la Policía Nacional y la xefa de sección de Xestión Arqueolóxica de la Conseyería.

Nel primer alcuentru alcordóse ellaborar un protocolu qu’estableza les directrices pa un usu correctu de los detectores de metal. “Paeznos que pue ser una ferramienta valiosa pa que les persones qu’asina lo quieran los usen ensin comprometer el patrimoniu arqueolóxicu”, esplicó Pablo León.

Amás, tres d’analizar los mecanismos llegales y les pautes d’actuación que se siguen n’otres comunidaes, la Conseyería va estudiar dalgunos cambeos nel reglamentu de la Llei de Patrimoniu cola mira d’actualizar la norma y adaptala a esta situación nueva.

L’oxetivu prioritariu de la comisión ye analizar el fenómenu actual del usu de detectores de metal y la so incidencia sobre’l patrimoniu arqueolóxicu. Nos últimos tiempos constatóse una medría curiosa de los descubrimientos de bienes arqueolóxicos de toa mena como consecuencia del usu d’estos detectores y resulta esmolecedor qu’esti usu pueda provocar daños en xacimientos arqueolóxicos y l’espoliu de bienes culturales.

Por eso, la Dirección Xeneral de Patrimoniu propón que’l grupu de trabayu afonde na situación llegal del usu d’estos instrumentos, amás de nes práctiques que siguen los organismos qu’intervienen nel procesu. D’esta manera, aspírase a articular protocolos coordinaos y evaluar los cambeos necesarios nel procedimientu y na normativa p’atayar el problema.

Audio con declaraciones del director general de Cultura y Patrimonio, Pablo León (mp3 587 Kb)???????